ТАЗАЛЫК

Арам ида кошт, моло нергенат шоналтыза

Тӱнямбалне у коронавирус инфекцийын кечын шарлымыжлан кӧра Марий Элыште илыше калыкат тиде чер дечын чот лӱдаш тӱҥалын да тестым эрташ лупшалтын. Тыге, коронавируслан анализым налме пунктлашке кужу черет шуйналтын. Тестым лачшымак кӧмытлан эрташ кӱлмӧ, анализын данныйжым могай радам дене пеҥгыдемдыме да моло йодышлам теҥгече регионысо журналист-шамычлан Марий Элын тӱҥ санитарный врачше Светлана Булатова рашемден:

– Калыкын коронавируслан тергалташ кумылжо уло гын, ме тудын праважым пудыртен огына керт. Но таза еҥлан медицине тӧнежыш кошташ кӱлешыже уке. Ик велым, спецсредан пробирке-влак Роспотребнадзорын пунчалже почеш тергалтше граждан-шамычлан кӱлыт. Вес велым, таза еҥ больницыште осал инфекций дене авалталтын кертеш.

Россий Федераций тӱҥ санитарный врачын 2020 ий 30 мартыште лукмо 9-ше номеран пунчалже дене келшышын, нине еҥ коронавирус дене черланен кертме шотышто обязательно тергалтшаш улыт:

1. Россий кумдыкыш йот элла гыч кылмен черланыме палан пӧртылшӧ граждан-влак (тыгайже 2 апрельлан 600 нарын улыт, медицине учёт гыч кораҥдыме дене нунын чотышт кече еда 100 наре еҥлан шагалемеш);

2. Коронавирус черан-влак дене кылым кучышо-шамыч (2 апрельлан республикыштына коронавирус дене ныл еҥ черланен, нунын дене кылым кучышо чыла гражданым рашемдыме. Нине 200 наре еҥым медицине велым эскерат. Тылеч посна коронавирус дене черланыше-влакын илыме да лийме верлаштышт Роспотребнадзорын пашаеҥже ден эпидемиолог-шамыч пашам ыштат);

3. «Больнице деч ӧрдыжсӧ пневмоний» диагнозан черле-влак;

4. Кылмен черланымылан кӧра медицине полышым йодшо 65 ий деч кугурак граждан-шамыч;

5. Коронавирус дене черланен кертше медицине пашаеҥ-влак (арняш ик гана, коронавирус дене черланен кертмым шижмеке – вигак);

6. Петырыме типан специальный туныктымо-воспитатлыме тӧнежлаште, кадет корпуслаште, интернат-пӧртлаште, ФСИН-ын тӧнежлаштыже илыше (шинчыше)-шамыч;

7. Кудымшо пунктышто палемдыме тӧнежлаште пашам ыштыше граждан-влак (кылмен черланымыштым шижме годым).

Республикыште илыше чыла еҥ деч йодам, кызытсе неле жапыште чумыр медицине сообществылан тыгай кугу пашам ыштен шукташыже полшынеда гын, мӧҥгыштыда кодса.

Роспотребнадзор ден полиций пашаеҥ-влак республикыштына, Россий президентын указшым шотыш налде, ончычсо семынак пашам ыштыше 12 предприятийым рашемденыт. Нунын шотышто административный мере

лиеш. Тылеч посна МВД гыч коллегына-влак коронавирус шотышто карантиныште улшо-влакым кӱлынак эскерат. Ушештарем, тудын режимжым пудыртышо-шамычымат административно мут кучаш шогалтат.

Республикыштына коронавируслан налме материалым Гигиене да эпидемилогий рӱдерыште да СПИД-рӱдерыште тергат. Анализым налаш тӱҥалме жап гыч 3600 утла тестым эртарыме. Специалист-влак кум смене дене тыршат, материалым куд-шым шагат шымлат, но тиде пашам ик суткаштак шуктат. Результат коронавирус дене черланымым ончыкта але кокытеланымашым луктеш гын, анализым Москва оласе Противочумный рӱдерыш колтат. Тудын шымлымыже да пеҥгыдемдымыж деч вара веле ме «да, республикыштына коронавирус дене черланыше еҥ уло» манын кертына. Сандене первичный лабораторийын результатше чылаж годымак огыл коронавирус дене черланымым пеҥгыдемда але шӧра.

М.ИВАНОВА

Опубликовать в Одноклассники

Добавить комментарий