26 сентябрьыште Марий самырык театрыште «Кок родо – пошкудо» спектакльын премьерже лиеш. Тӱҥ рольым, Настачим, тушто Марий Элын калык артистше Светлана НИКИТИНА модеш.
Парт кокла гыч – училищыш
Светлана изинекак усталык шӱлышан, провор йоча кушкын, книгам лудаш, мураш йӧратен. Сандене кокымшо класс деч вара Йошкар-Оласе 1-ше №-ан музыкально-художественный интернат-школын фортепиано классышкыже тунемаш толын. Ӱдыр семӱзгарым шоктен, хорышто мурен. Эше тунамак концерт дене Российын рӱдолаж деч посна Свердловск олаште лийын.
– Свердловскышто экскурсий дене коштмо годым театральный училище воктеч эртен ошкылынна. Ӱдыр-рвезе-влак кокла гыч кенета ала-кӧ кычкыралын: «Никитина, теве тылат тышке тунемаш пураш кӱлеш!» Молан лачшымак мылам тыге ойленыт? Школышто тунемме годым икмыняр туныктышын йӱкшӧ дене мутланенам, тудын койышыжым койынам. Варажым йолташ-шамыч дене погынен шинчыме годымат тиде але вес кугурак еҥым оҥарен ончыкташ йодыт ыле, – парт коклаште шинчыме жапшым шарналта С.Никитина.
Светланалан тунам артист койышым ончыкташ келшен, но ончыкыжым артист лияш шоненжат огыл.
– Пытартыш классыште тунемме годым пырля тунемме йолташем, Алексей Алексеев (кызыт Эстонийыште ила – авт.), Палантай лӱмеш музыкальный училищыште театр пӧлкам почмо нерген пален налын да тушко мыланемат тунемаш пураш темлен, – ойла Светлана.
Экзаменыш мийымекыже, моло семын Никитинат жюрин йодмыж почеш почеламутым лудын, мурым мурен, куштен, этюдым модын ончыктен.
А Морко ӱдырлан артист лияш Юмыжак пӱрен улмаш. Пӱртӱс тудлан мотор капкылым, сылне йӱкым, мастарлыкым… пуэн. А мыняр кӧргӧ вий-куатше?!
«Айвика», «Эргымлан кузык» да молат
1990-1994 ийлаште И.Палантай лӱмеш музыкальный училищын актёр пӧлкаштыже тунемме жап С.Никитинан ушышкыжо…
(Умбакыже материалым 25.09.2021 лекше газетыште лудаш лиеш)
