«Кугу Какшан» заповедникын лӱмгечыжын идалыкшым палемдыме шот дене ме тудын пашаеҥже-влак дене тендам жапын-жапын палдараш тӱҥалына. Тачысе унана — Олег Игнатенко. Марий кугыжаныш университетын биологий-химий факультетшым тунем пытарыме деч вара 1997 ий гыч заповедникыште тырша. Кугыжаныш инспектор гыч тӱҥалын. Оролымо шотышто заповедникын директоржын алмаштышыжланат ыштен. Кызыт — кугурак кугыжаныш инспектор. Икмыняр йодышым тудлан пуэна.
— Кугыжаныш инспекторын пашаштыже мо эн неле?
— Шындыме задачым шукташ ресурс ок сите.
— Изи годсо пагыт гыч мом шарнен кодында?
— Байкал велне кушшо кукмакын (багульникын) ӱпшыжӧ.
— Кумыл нӧлталтме годым мом ышташ йӧратеда?
— Шкаланем иктаж-могай пашам муам да тудым уло кумыл дене мучаш марте шуктем.
— Пӱртӱс лоҥгаште лийме годым пиалан лияш мо тыланда эше кӱлеш?
— Тыглай илышыште мый цивилизаций деч посна илен кертам.
— Могай сеҥымашым эн тӱҥлан шотледа?
— Кок эргым.
— Шочшыда деч молан тунемында?
— Йӧраташ.
— Илышыште иктаж-могай шоныдымо ошкылым ыштенда?
— Тыгаят лийын. Магаданыште практикыште лийме годым йӧршеш шкет браконьер-влакым кучаш пижынам. Мыйын пиалеш, чылажат сайын мучашлалтын.
— Моло кугыжаныш инспектор да чодыраш коштшо тыглай еҥ-влаклан могай тыланымашда лиеш?
— Йӧратыза шкенан пӱртӱсым. Шарныза: ме ты тӱняш унала гына толынна.
С.Носова ямыдылен.
Снимкыште: Олег Ингатенко.
Фотографийым «Кугу Кашан» заповедникын социальный сетьысе сайтше гыч налме.
