11-13 майыште Провой кундемысе «Алмаз» (Поянсола культур пєрт) да «Акпарс-У вий» («Жемчужина» СОК) военно-патриотический клубыш коштшо кадет-юнармеец-влак «Разведчик-2018» полевой лагерьыште лийыныт.
– Йӱла почеш тудо кажне ийын эрта, кум кече шуйна. Тений игече пеш мотор ыле. Участник-влакланат чодыраште пеш келшен. Мєҥгышкышт сай шарнымаш дене толыныт. Лагерьыште рвезе-влак илышыште вашлиялтше тӱрлє чаракым сеҥен лекташ тунемыт. Мутлан, эҥер гоч писын вончаш, автоматым рончен-погаш, ваш пижын кучедалаш… Тӱҥжє – военный пашалан, спецназлан ямдылалтыт. Тыгай мероприятийым специальный ямдылалтме «Борус» рӱдер эртара. Вуйлатышыже – Сергей Чиканов, – манеш Звенигово районысо кок клубын вуйлатышыже А.Щербаков. – Тыге рвезе-влак шкеныштым ончылгоч салтак илышлан ямдылат, писылыкым, чулымлыкым вияҥдат, патыр лийыт, икте-весылан полшаш тунемыт.
Команде гыч Даниил Васильевлан (тудо тыгак каратэ дене республик, регион-влак кокласе турнирласе призёр), Глеб Мудровлан («Юнармеец» клубын командирже) моткоч келшен: противогазым чияш, автомат дене «минан участкым» эрташ, команде денак наступленийыш лекташ да «сусыр-влаклан» медицине полышым чын пуаш…
Тений ты лагерьыш Йошкар-Ола, Козьмодемьянск, Медведево, Волжск, Провой кундемла гыч чумыргеныт. Ты мероприятий тыгак таза илыш-йӱлам кучымо, самырык-влакым патриотизм шӱлышеш шуарыме амал дене эрта.
Шукерте огыл «Зарница-Поволжья» военно-спортивный модмаш лийын. Тушто Кужмарий кыдалаш школысо юнармеец-влакын сборный командышт икымше верым сеҥен налын. Кеҥежым самырык-шамыч республик кӱкшытан «Зарнице» модмаште вийыштым тергат. Тушко «Шурави» военно-патриотический клубын вуйлатышыже А.Щербаковат кая.
Е.Эшкинина.
