11 апрельыште Йошкар-Оласе «Дружба» стадионышто шорт-трекым йӧратыше спортсмен-влаклан ты вид дене мастер-классым ончыктеныт. Тудым Олимпийский модмашын (2006 ий)участникше, Европын (2012 ий), тӱнямбал чемпионатын (2013 ий) ший призёржо, ик гана веле огыл Российын чемпионжо Вячеслав Кургинян ончыктен. Тудо верысе тренер-влак А.Гусев да И.Денисов дене ий ӱмбалне тренировкым эртарен. Нуно шорт-трек дене сайын мунчалтен, шӱкалын кайыме техникын посна элементшым уэш-пачаш ыштеныт. Варажым видеоматериал негызеш таҥасымаште палемдыме дистанцийым эртыме нерген каҥашеныт.
В.Кургинянын палемдымыж почеш, республикыште шорт-трекым вияҥдыме шотышто моткоч чапле спорт объект, тыгак уста йоча, тренер-влак улыт.
Мучашлан толшо уна спорт школын тренерже-шамычлан ой-каҥашым пуэн да пашаштышт кучылташ программым коден.
Марий Элыш кеҥежым толаш сӧрен.
Е.Эшкинина.