Еҥ кана, а нуно пашам ыштат

Илышыш куан кумылым пурташ, калыкнам тӱвыралан, йӱлалан шӱмаҥдаш — тыгай пашам шуктат культур аланыште тыршыше-влак. 

23 мартыште  В.И.Ленин лӱмеш тӱвыра полатыште культур пашаеҥын кечыжлан пӧлеклалтше пайрем эртен. Тудым торжественно почмаште Марий Эл правительстве председательын икымше алмаштышыже, тӱвыра, печать да калык-влакын пашашт шотышто министр Михаил Васютин, Кугыжаныш Погын председательын алмаштышыже Анатолий Иванов лийыныт. Тӱвыра аланыште тыршыше пашаеҥ, ветеран да залыште шинчыше-влакым пайрем дене саламлымеке, Михаил Зиновьевич Морко рӱдӧ клуб системын директоржо Владимир Дмитриевлан «Марий Эл культурын сулло пашаеҥже» лӱмым пеҥгыдемдыше медальым да пеледыш аршашым кучыктыш. Тиддеч вара  «Ялласе эн сай муниципальный культур учреждений” да “Ялысе тӱвыра учреждений-влакын эн сай пашаеҥышт” конкурслаште сеҥыше-влакым палемдыш. Ятыр ий культурышто пашам ыштыше икмыняр еҥ Почетан грамот да Тауштымашан серыш дене палемдалте.

— Ыштыме пашалан сай акым пуымо — моткоч сай. Премий окса дене «Ростань» ансамбльын  ӱдырамашыже-влаклан Краснодарыште сценылык вургемым ургыкташ шонена, — палемдыш Советский районысо Михайловко ялысе культур пӧрт вуйлатыше Виктор Анисимов.

Виктор Васильевич культур аланыште ӱмыржӧ мучко пашам ышта. Жапше годым культпроссветучилищым, варажым Казаньыште культур институтым, тиддеч вара музыкальный училищым тунем лекмеке, вик ялысе клубышкыжо толын да уло илышыжым ты пашалан пӧлеклен. Тудын пелашыжат тӱвыра пӧртыштак ышта, художественный вуйлатыше сомылым шукта.

Провой кундемысе Ташнур культур пӧртым марий шӱлышан, марий койышан да пашам йӧратыше пӧръеҥ Алексей Дружинин вуйлата. Тушто шым коллектив пашам ышта, кажныже тӱрлӧ кундемыш лектын коштеш, тӱрлӧ конкурсышто мастарлыкым ончыкта. Санденак ты культур пӧртат «Ялысе эн сай культур учреждений» конкурсышто сеҥыше  радамыш логалын.

— Эн сай-влак коклаш логалмаш тиде — тӱшка вий дене ыштыме паша. Ме идалык мучко тӱрлӧ пайремым, конкурсым, ятыр вашлиймашым эртаренна. Чылажат верысе калыкым куандараш ышталтеш. Икте-весе дене келшен илен, пашам ыштен веле сеҥымашке шуаш лиеш. А тыгай премийым налмеке, ончыкыжо пашам вияҥден колташ манын, клубнам олмыкташ шонена, -ыштышаш пашашт нерген каласыш Алексей Николаевич.

Пайремын кокымшо ужашыштыже «Калейдоскоп» фестиваль-конкурсышто лауреат лӱмым налше-влакым саламлышт да нунак муро да куштымашышт дене кумылым нӧлтышт. 

Алевтина Байкова.

М.Скобелевын фотожо.