Маристатын данныйже почеш, республикыште илыше-влакын кокла пашадарышт тений январьыште 24 952 теҥге лийын да ӱмашсе тыгаяк жап деч 13,4 процентлан кӱзен.
Эн сай, кокла деч 1,5 пачаш кугу, пашадарым информаций да кыл сферыште налыныт. Тылеч посна кугу пашадар финанс да страхований организацийлаштат палдырнен. Тушто тыршыше-шамычын пашадарышт – кокла деч 1,3 пачаш кугу.
Административный пашам шуктымо, ешартыш услугым пуымо организацийлаште регионысо кокла пашадар деч 1,5 пачаш шагал налыныт.
Изи предпринимательствылан шотлалтдыме, 15 деч шуко огыл еҥан организацийлаште кокла пашадар 26 776 теҥгеш шуын. Тиде цифр кодшо ий тыгаяк жап деч 12,6 процентлан кугу лийын.
М.ИВАНОВА.
