13-14 мартыште Йошкар-Олаште Сеҥымашын XXX идалыкше лӱмеш тӱвыра полатыште «Кызытсе лабораторный технологий да профессиональный медицине: клинике-диагностике лабораторийын специалистше да врач-клиницист-влакын профессиональный кӱкшытыштым нӧлталмылан фокус» шинчымашым пуымо-налме научно-практический конференций эртен.
Тушто Москва, Чебоксар, Казань, Самара да Йошкар-Ола лабораторный службын специалистше-влак участвоватленыт. Нуно эн сай клинике-диагностике лабораторийын опытшо да инновационный технологий дене палыме лийыныт.
Конференций жапыште тӱвыра полатын фойештыже клинике-диагностике лабораторийлан ямдылыме у оборудований да материал ончер пашам ыштен. Красногорск олаште верланыше «Stormoff» компанийын медицине оборудованийже, материалже-влак, тыгак пашаж дене менеджер-шамыч Ольга Галдобина ден Сергей Коршенко радамлын палдареныт. Чебоксар оласе «Медиквест» компанийынат ойыртемалтше сатужо шуко еҥын тӱткышыжым налын. Йошкар-Ола гыч шке медицине продукцийжым «Янтарь» ООО ончыктен. Шондын биохимий анализшым рашемдаш полшышо тест-полоско-влакым ыштыше «Биосенсор АН» компанийын ончержат йырже шуко еҥым чумырен…
Тиде ончерыште медицине организаций-влак кызытсе жаплан келшыше медицине материал ден оборудованийлан йодмашым пуэн, нуным вераҥдаш ойпидышым ыштен кертыныт.
М.ИВАНОВА.
М.Скобелевын фотожо.