СОЦИАЛЬНЫЙ ИЛЫШ

Конкурс: Президентын грантше верч

Социальный пашам шуктышо коммерческий огыл организаций-влакын проектыштым илышыш шыҥдараш 2018 ийыште 8 млрд. теҥге ойыралтеш. Тудым 15 декабрь марте эртыше кок конкурс деч вара шеледаш палемдыме. Тиде пунчалым Россий Федерацийын Президентше Владимир Путин тений 19 февральыште луктын. 

Президент грант-влак фондын увертарымыж почеш, икымше конкурсышто участвоватлыме нерген йодмашым 20 февраль гыч 26 март йотке пуаш лиеш. Тудым office@pgrants.ru сайтын личный кабинетше гоч формироватлен колтыман.

Конкурсыш коммерческий да правительственный огыл организаций-влакын нине направлений дене пашам ышташ палемдыме проектыштым темлаш лиеш:

  • граждан-влакым социально обслуживатлымаш да аралымаш, нунылан социальный полышым пуымаш;
  • граждан-влакын тазалыкыштым аралымаш, калык коклашке таза илыш-йӱлам шарымаш;
  • ешлан, авалан, ачалан да йочалан полшымаш;
  • 1996 ий 12 январьыште лукмо «Коммерческий огыл организаций-влак нерген» федеральный законын 31.1-ше статьяж дене келшышын пашам ыштыше самырык-влакын проектыштым илышыш шыҥдараш полшымаш;
  • науко, образований да просвещений кумдыкысо проект-влаклан полшымаш;
  • тӱвыра да сымыктыш кумдыкысо проект-влаклан полшымаш;
  • тӱвыра да сымыктыш аланыште уста самырык еҥ-влакым рашемдымаш да нунылан полшымаш;
  • историй акан шарныктыш-влакым арален кодымаш;
  • гражданинын да айдемын (ты шотыштак эрык деч посна кодымо-влакын) правашт ден эрыкыштым аралымаш;
  • йырым-йырысе среда ден янлыкым аралымаш;
  • наций ден религий-влак коклаште келшымашым пеҥгыдемдымаш;
  • мер дипломатийлан да йот эллаште илыше землякна-влаклан полшымаш;
  • гражданский обществе институтым вияҥдымаш.

Конкурсым 2018 ий 1 июньышто иктешлаш палемдыме.

Кокымшо конкурсыш йодмашым 16 июль гыч 10 сентябрь марте пуаш лиеш.

М.ИВАНОВА. 

Опубликовать в Одноклассники

Добавить комментарий