Республикысе курчак театрлан — 75 ий
Кодшо курымысо курчакым ужын кертына
21 мартыште Т.Евсеев лӱмеш национальный тоштерыште Республикысе курчак театрын 75 ияш лӱмгечыжлан пӧлеклалтше выставке почылтеш. Тушто тӱрлӧ спектакльысе (кудыжо таче репертуарыште уке) курчак-влакым веле огыл, театрым тӱрлӧ жапыште вуйлатыше да режиссер-влакын фотокартычкыштым, тыгак спектакль-влакын программыштым, буклетыштым ужаш лиеш. А ик эн ӧрыктарыше экспонат семын кодшо курымын 50-70-ше ийласе фотографий ден афише, 1942 ийыште театрым чоҥаш кӱлмӧ нерген лукмо приказын копийжым шотлыман.
Выставкым почмаште театрын артистше-шамыч 1942 ийыште икымше гана шындалтше «Петрушка у малышей» спектакль гыч ужашым модын ончыктат. Тиддеч посна театрын историйже дене кылдалтше интерактивный диск дене кӱчыкын палдарат. Дискым театр Марий Эл Республикын колыштмо-ончымо документ-влак кугыжаныш архив дене пырля лукташ ямдыла.
А.Байкова.