Таче, 22 майыште, Марий Элым вуйлатыше Александр Евстифеев РФ У коронавирус инфекцийын шарлымыж ваштареш шогымо шотышто кугыжаныш советшын пашаче группыжын заседанийыштыже участвоватлен. Тудым Сергей Собянин вӱден.
Заседанийыште элнан субъектлаштыже улшо эпидемий ситуацийым лончыленыт, тыгак тазалыкым аралыме системын мобилизацийже шотышто – регионлаште инфекционный койкым ешарыме, эмлымверлашке кӱлешан оборудованийым ситарыме – йодышым каҥашеныт.
Марий Элыште таче кече марте COVID-19 дене черланыме 1397 случайым регистрироватлыме. Коронавирусан пациент-шамычлан полшаш кандаш медицине тӧнежыште 680 койкым шындыме.
Республик медик-шамычлан шкем аралыме средствым налынак шога, эмлаш кӱлшӧ препарат шапашымат ситышын ямдылен.
1-ше №-ан медико-санитарный частьыште пневмоний дене нелемше коронавирусан инфекцийым чытен лекше пациент-шамычлан отделений почылтеш. Тушко инфекциян огыл моло хронический чер улмо ӱмбач у коронавирус инфекций деч стационарыште эмлалтше да COVID-19 улмым пеҥгыдемдыше тестым кок гана налше пациент-влакым колтат. У отделенийыште нуно бронхо да шодо системе велым реабилитацийым, тыгак коронавирус инфекций дене орланымышт годым тымарте лийше моло черын нелеммышт шотышто профилактикым эртат.
У коронавирус инфекций деч профилактике, черым шижтарыме да тудын деч кодшым кораҥдыме шотышто мероприятий-влакым эртарашлан Марий Эл правительствын резерв фондшо гыч 66 млн. теҥгем ойырымо. Тиде окса дене кислородым централизованно шупшмо, ИВЛ аппаратым, у коронавирус инфекцийым писынрак рашемдашлан лабораторийлашке куатым ешарыше оборудованийым, биологический материалым кондыштарыме да аралыме контейнерым, COVID-19 эмлаш медикаментым, нелын черланыше-шамычым кондыштараш боксым налме.
Регионысо экономикыште кӱлешан отрасль-влаклан пашам ышташ да республикыште илыше-шамычлан паша верым арален кодаш йӧным ыштыме. Системообразующий манме предприятий-шамычын спискыштым чумырымо, санитарный йодмашым шуктен, кызыт ышташ лийме да кӱлмӧ пашам рашемдыме.
Марий Элым вуйлатышын организаций да аналитике виктемжын уверже негызеш М.ИВАНОВА ямдылен
