Марий Турек ялозанлык механизаций техникумлан – 70 ий.
Тиде тунемме тӧнеж 1947 ий 18 октябрьыште почылтын. Тунам Марий Турек посёлкышто талукаш кугыжаныш ялозанлык школ пашам ышташ тӱҥалын да младший ветеринар ден бригадир-влакым ямдылен. Изиш варарак тыште ферме вуйлатыше ден счетовод-шамыч шинчымашым налыныт. Кодшо курымын кудлымшо ийла тӱҥалтыштыже яллаште училище-влак почылтыныт да нуным СПТУ маныныт. Тыште эн шукыжо тракторист-машинист-влакым ямдыленыт. Тыге тиде тӧнежым шымле ий жапыште чылаже коло кок тӱжем ӱдыр ден рвезе тунем лектын. Кок ий ончыч училище техникум статусым налын. Кызыт тыште тӱрлӧ специальность дене 287 тунемше шинчымашым очно да заочно пога.
В.Смоленцев.
