Тений пӱртӱс Крешеньыланат ӧрыктарыш. Метеоролог-влакын палемдымышт почеш, пытартыш 68 ийыште тыгай лийын огыл ыле: Российын кугу ужашыштыже леве шоген. Марий Элыште гын Крешене йӱдым кок градус леве лийын. Синоптик-влакын ойлымышт почеш, шушаш арняштат тыгаяк леве шогаш тӱҥалеш.
Игечын койышыжланак кӧра Крешене вӱдышкат чыла вережак пураш йӧн лийын огыл, молан манаш гын эҥер ден ерласе ий ӱмбак лекташ лӱдыкшӧ лийын. МЧС специалист-шамычат ончылгоч шижтареныт, ий ӱмбаке тӱшкан лекташ ок темлалт, волен каяш лиеш. Туге гынат республик мучко йӱштылаш чылаже 19 тыгай верым ямдыленыт, но латкудытыштыжо веле тидым ыштеныт. Тыгак храм пеленысе памашлаштат чывылталт лекташ йӧн лийын.
Южо черкысе памаш воктеныже калык поснак шолын. Мутлан, Ежовысо монастырьысе памашымак налаш. Чывылталташат, вӱдым налаш шонышыланат черетыште кужу жап шогаш логалын. А теве Ким воктенысе памашыш пурышна гын, тушто ик-кок еш гына лийын. Кеч ты верже кугорно деч изиш ӧрдыжтырак вераҥын. Туге гынат ваштареш ведра дене вӱдлан толшат вашлиялте. А памашыжым православный черке йӱла дене келшышын тӱзатен шындыме. Тыште вӱдым налашат, чывылалт лекташат, юмылан пелешташат келыштарыме. Ик еш тольо гын, эсогыл шым ияш изи эргыштат вӱдыш пурен лекте.
Крешне кечын православный-влак ыресым чыкен лукман вӱдым налаш черкыш вашкат гын, весышт тидлан памашым ойырат, вет эсогыл ученый-влак палемдат, ты кечын кеч-могай вӱдат тазалыкым пеҥгыдемден кертше ойыртемым налеш. Сандене Крешеньылан вӱдым налме, йӱштылаш пурымо йӱла-влак, айдемын могай верам кучымыжым шотыш налде, пеҥгыдемынак толыт.
Йошкар-Оласе епархий кажне ийын 19 январьыште Изи Какшан эҥер серыш ырес дене волымо да вӱдыш юмын шӱлышым пуртымо йӱлам эртара. Вознесений черке воктене калык кажне гана шукын погына. Теният тыгак ыле. А Крешене вӱдыш тыглай йӱштылаш пурен лекташ шонышо-шамычланже вакым рӱдӧ пляж воктене келыштареныт ыле. Лач тушто МЧС специалист, медик, волонтёр-шамыч дежуритленыт. Вӱдыш пурымо деч ончыч да вара еҥ-влак ынышт кылме манын, ырыкталтше палаткымат тидлан шогалтеныт. Тушто шокшо чайымат темленыт.
С.НОСОВА
Снимкылаште: Вознесений черке воктене; Иван ден Андрей Масалыкинмыт йуштылаш толыныт.
С.Скобелевын фотожо
