УВЕР ЙОГЫН

Акций: Ленинград киндын тамже

Районысо волонтёр-влакын «Шарнымаш нимучашдыме лийшаш» проект кышкарыштышт Ленинград блокадым тичмашын кораҥдымылан 75 ий теме лӱмеш Куженер посёлкышто «Ленинград кинде» акций икымше гана эртен. 

Тудым Йоча-влаклан ешартыш шинчымашым пуымо комплексный рӱдерын «Пырляште ме вий улына» отрядшын 10 волонтёржо да Кужэҥер тӱҥ школын 6-шо классыштыже тунемше 10 ӱдыр-рвезе организоватленыт. Акцийын спонсоржо – Кужэҥер районысо калыкым социально обслуживатлыме комплексный рӱдер.

Акций 26 январьыште 8 шагатат 20 минутлан Кужэҥер тӱҥ школышто тӱҥалын. Тушко 5-9-ше класслаште тунемше 178 ӱдыр-рвезе ушнен. 15 шагатлан организатор-шамыч калыкым посёлкысо рӱдӧ площадьысе фонтан воктене вученыт. Чаманен палемдыман, йӱштӧ игече шогымылан кӧра тышке еҥ палынак шагал погынен. Ты кечынак Кужэҥер район администраций вуйлатышым алмаштыше Н.Желонкина, образований пӧлкан вӱдышӧ специалистше М.Горинова, Калыкым социально обслуживатлыме комплексный рӱдерын пашаеҥже-влак 11 ияшыж годым шучко блокадым илен лекше Зинаида Фёдоровна Емельянова деке миен толыныт.

«Ленинград кинде» акций 27 январьыште Кужэҥер посёлкысо 2-шо №-ан школышто мучашлалтын. Тушко 5-7 класслаште тунемше 126 ӱдыр-рвезе ушнен. Воинский чап кечын проектын авторжо-шамыч тунемше-влаклан Зинаида Фёдоровнан шарнымаш сынан «Ленинград, шӱмыштем улат» фильмжым ончыктеныт.

М.ИВАНОВА.

 

Опубликовать в Одноклассники

Добавить комментарий