Кугыжаныш Думын депутатше-влак Виктор Кидяев ден Светлана Солнцева Федеральный корно агентстве вуйлатышылан Йошкар-Ола – Зеленодольск корным, «Юл» магистраль марте, утыжден кужу жап шотыш кондымо нерген ушештареныт.
Корным чоҥымо, Российысе кӱлешан корно-влакын качествышт могай улмо дене кылдалтше йодышым Кугыжаныш Думын депутатше-влак «Единый Россий» фракций вуйлатышын икымше алмаштышыже Виктор Кидяевын фракций кӧргысӧ заседанийыштыже каҥашеныт. Пӱсо йодыш-влаклан Федеральный корно агенстве вуйлатыше Роман Старовойт вашештен.
Депутат Светлана Солнцева ушештарен: агентстве эше 2012 ийыштак федеральный значениян Йошкар-Ола – Зеленодольск кугорнын икымше участкыштыже реконструкцийым ыштен. Адакшым тиде корнын вес участкыжлан проект документацийым ямдылыме да госэкспертизым эртарыме. Тудыжо Силикатный поселко воктеч эрта.
«2014 ий гыч паша чарнен шогалын. Тиде илыме верыште кум ий транзит транспорт кудалыштеш. Тидлан кӧра корно движений лӱдыкшыдымылык шотышто нелылык лектеш. Силикатный поселкышто корно туткар шуэн огыл лиеда. Пытартыш жапыште тудо эшеат чӱчкыдын вашлиялташ тӱҥалын», — палемден Светлана Солнцева.
Роман Старовойт тиде нелылыкым 2017-2018 ийлаште кораҥдышаш нерген ойлен. Но тидлан корно пашаеҥ-влаклан депутат-влакын полышыштат кӱлмым палемден.
Л.Камалетдинова.
