Йошкар-Олаште «2017 ийыште кызытсе ола илышым тӱзатымаш» проектым шыҥдарыме дене кылдалтын, рӱдоласе Воскресенский набережныйыште кодшо кечылаште изи сквер почылтын. Калык чоным эн савырышыже тыште — раш жапым ончыктышо кече шагат.
Калыклан канашыже ойырымо кундемыште ик тылзе коклаште шелышталтше плиткым вашталтеныт, постамент деке лишемме тошкалтышым уэмденыт, лавкым ыштылыныт, теҥгыл-влакым вераҥденыт, угыч ыштыме ятыр клумбеш пеледышым шынденыт. Изиш варарак самырык пушеҥгым вераҥдат.
Изи скверым почмо кечым йӱран игече шӱлыкаҥдаш тӧчыш гынат, тышке погынышо еҥ-влакын кумылышт нӧлталтше лийын. Лач скверын рӱдӧ верыштыже постаментеш шогалтыме кече шагат гына кечыжын пыл шеҥгелан шылмыжлан кӧра раш жапым ончыктен кертын огыл. А теве кызытсе кечан кечылаште тыште еҥ-шамычым шуко ужаш лиеш: кӧжӧ кидшагатысе жапым терга, кӧжӧ сото телефонышкыжо ончалеш. Кече шагат ок ондале.
Изи сквер канаш келыштаралтме дене пырля йолешке-влаклан Архангельский слобода гыч Воскресенский набережныйыш вончаш корным утларак йӧнаным ышта. Тушко кум аллей гыч йолгорно толеш: Воскресенский набережный, Чернышевский ден Анисимовский уремла велым ошкыл вончаш лӱдыкшӧ огыл.
Ушештарена: «Кызытсе ола илышым тӱзатымаш» программе вич ийлан палемдалтын. Тудын дене келшышын, калыклан лач шкаланже эн келшыше кундемлам, тыгак уремлам, кудывечылам, тӱшкан пайдаланыме ужар верлам тушто илаш йӧнлым ышташ.
А.АНДРЕЕВ.