Кучемыште
Пашам умбакыжат тыгак шуят
7 сентябрь гыч Марий Элыште чрезвычайный ситуаций режим кораҥдалтеш.
Тидын нерген регион вуйлатыше Александр Евстифеев теҥгече эрдене оперативный штабын заседанийыштыже каласен.
Республикын правительстве председательжын алмаштышыже Степан Воронцов палдарен: кызыт 3 гектар кумдык эҥеш.
– Авиалесоохранын вийже, чодыра участке-влакын арендаторышт дене умбакыжат пашам ышташ тӱҥалына. Волонтер-шамычым ушаш кӱлешлык уке, шонем. Илемлашке тул куснымо лӱдыкшӧ уке, – палдарен Степан Воронцов.
Марий Эл вуйлатыше торфяникын тӱрыс эҥмым чарнымешкыже да шикшештме пытымешке пашам ыштыман манын палемден.
– Илем ден еҥ-влаклан, пӱртӱслан лӱдыкшӧ уке, сандене чрезвычайный ситуаций режимым кораҥдена, – каласен Александр Евстифеев.
Молгунамсе семынак Марий Эл вуйлатыше тул ваштареш кучедалше-шамыч дене мутланен да профессионализмыштлан, лӱддымылыкым ончыктымыштлан, пашам келшышын шуктымыштлан тауштен.
– Шикш шагалемаш тӱҥалын гынат, тудо эше палдырна. Изишак йӱр полша, но утларакше тендан кидда да моштымашда полшат. Чрезвычайный ситуаций режимым эрла гыч кораҥдена гынат, тиде шикш дене кучедалмым чарнымым огеш ончыкто. Туткар тӱҥалмылан кодшо изарнян кок арнят пеле лийын. Но тудым ме достойнын чытен лектынна да лектышыжат коеш: кожлам арален кодымо, еҥ-влак эмганен огытыл, сусыргышат лийын огыл. Чодырам уэмден шындымаш – мемнан тӱшка задачына. Ме йыжыҥын-йыжыҥын пашам ышташ тӱҥалына: эн ончычак шикшештмым пытарена, а вара чодырам уэш шындена. Паша сита, – ойлен Александр Евстифеев.
Марий Эл Республикым вуйлатышын организаций да аналитике виктемжын уверже негызеш Л.Камалетдинова ямдылен.
