4 январьыште Россий тӱвыран сулло пашаеҥже, Марий Эл Кугыжаныш да Олык Ипай лӱмеш кугыжаныш молодежный премий-влакын лауреатше, Республикысе калык усталык да тӱвыра ден каныме паша шотышто шанче-методике рӱдерын вуйлатышыже
Тамара Викторовна
ДМИТРИЕВА
ош тӱня дене чеверласен.
Тамара Викторовна марий тӱвырам вияҥдымашке кугу надырым пыштен. Тудо – калык художественный творчествын профессионалже, марий куштымаш искусствын мастар еҥже. Т.Дмитриева Калык усталык рӱдерыш 1991 ийыште пашаш толын да пытартыш коло наре ий тудым вуйлатен, тӱвыра аланыште специалист-влакым кушташ тыршен, тыгак марий куштымашлан пӧлеклалтше ятыр книгам савыктен луктын, мурышо да куштышо «Эрвел марий» ансамбльым ятыр ий вуйлатен да балетмейстерже лийын. Тиддеч посна тудо М.Шкетан лӱмеш Марий национальный драме, Марий самырык да Курыкмарий драме театр-влакын спектакльыштлан изирак куштымаш-влакым шынден.
Тамара Викторовна марий шӱлышан, пашажым йӧратыше, кеч-могай йодышланат шонен-вискален вашмутым пуэн. Тудын моштен вуйлатымыж дене Калык усталык рӱдер Россий кӱкшытан шуко мероприятийым эртарен. 2004 да 2008 ийлаште республикысе рӱдерна Российысе конкурсышто «Эн сай рӱдер» лӱмым налше-влак радамыш логалын.
Ме Т.В.Дмитриеван ешыжлан, родо-тукымжылан да палымыже-влаклан кугу чаманымашнам каласена.
Тамара Викторовна, Те эреак мемнан чонышто лийыда, Ме Тендам шарнаш тӱҥалына.
«Марий Эл» газетын пашаче ешыже
