Поген налын кертыт мо?
Чоҥаш ойырымо мланде участкыште нимогай пашам эртарыме огыл гын, тудым поген налын кертыт мо? Але озажым мут кучаш шогалтат мо?
И.Петухов
Йошкар-Ола.
Йодышлан Росреестрын Марий Элысе виктемжын пресс-службыштыжо вашештеныт:
– Чоҥаш ойырымо участке оза-влакын ответственостьышт нерген РФ Административный правонарушений нерген кодексын 8.8 статьяжын 3-шо частьыштыже ойлалтеш. Участке дене озаже пайдаланен огыл гын, административный штрафым тугай случай годым пуат, кунам мланде участкын кадастр акше палемдыме. Штрафын кугытшо ты кадастр акын 1 гыч 1,5 процентше наре лиеш, но 20 тӱжем теҥге деч шагал огыл. А кунам участкын кадастр акше палемдалтын огыл, 25 гыч 50 тӱжем теҥге марте.
РФ Граждан кодексын 284-ше статьяж дене келшышын мланде участкым поген налынат кертыт. Тыгайже тунам лиеш, кунам тудо илыме але моло оралтым чоҥаш ойыралтын, но целевой назначений дене кум ий наре кучылталтын огыл але закон почеш утларак пагыт палемдалтын гын. Тиде кум ий пагытыш мланде участкым освоитлыме пагыт ок пурталт, тыгак кунам тудо стихийный туткарлан але моло обстоятельствылан кӧра целевой назначений дене кучылталтын огыл гын.
Иктешлен каласаш гын, чоҥаш ойырымо участкын озажым участкыж дене пайдаланыдымылан кум ий эртымеке гына мут кучаш шогалтен кертыт. Участкыжым кучылтмо огыл фактым кугыжаныш мланде надзор пашам шуктышо уполномоченный должностной лица гына рашемден кертеш.
С.Носова
