Октябрь мучаште Йошкар-Олаште «Марий калыкын кугыжанышыжым налмыжлан 100 ий» шанче-практик конференций эртен.
Тудым Марий Эл кугыжаныш архив Марий Эл Правительствын, Тӱвыра, савыктыш да калык паша шотышто министерствын, Моско олан Тӱҥ архив управленийжын полшымыж дене Zoom онлайн платформышто эртарен. Тидыжат конференцийын георгафийжым кумдаҥдаш полшен. Тушко мемнан республикысе кугыжаныш архив пашаеҥ-влак веле огыл, Моско ола, Башкортостан, Мордовий, Татарстан, Чуваш республикла, Угарман, Самара областьла гыч кугыжаныш кучемын еҥже, тыгак историк, краевед, тӱвыра да мер пашаеҥ-шамычат ушненыт.
Участник-влакым Марий Эл Правительстве председательын икымше алмаштышыже М.Васютин, тӱвыра, савыктыш да калык паша шотышто министр К.Иванов, Кугыжаныш Погын председатель А.Смирнов да молат саламленыт.
Конференцийын кокымшо ужашыштыже марий калыкын кугыжанышыже ышталтме да вияҥ толмыж дене кылдалтше йодыш-влакым каҥашеныт. Чылажымат архив материал негызеш.
С.НОСОВА
