Covid-19 дене черланен кертмым рашемдаш манын, шуко пациент, врачын палемдымыжым вучен шуктыде, шодыжым компьютер томографий (КТ) полшымо дене тергаш вашка.
Россий Минздравын лучевой да инструментальный диагностике шотышто тӱҥ специалистше Игорь Тюринын шонымыж почеш, КТ шодысо вашталтышым сайын рашемда, но инфекцийым огеш диагностироватле. Тидыже мо нерген ойла? Пациент респираторный чер дене черланен кертме шотышто вуйым шиеш, тыгодым КТ шодышто нимогай вашталтышым огеш ончыкто гынат, айдемын таза улмыжо, у коронавирус инфекций дене черланыдымыж нерген огеш ойло. Ковидын организмыште улмыжым лабораторийыште эртарыме диагностике, ПЦР-реакций да иммунологий тест-влак гына пеҥгыдемден кертыт.
Пациентын у коронавирус инфекций дене черланымыжым рашемдашлан ПЦР-реакцийым ыштат, тидланже логараҥ да неррож гыч мазокым налыт. Компьютер томографий Covid-19 инфекцийым диагностироватлыме дене нигузеат кылдалтын огыл. Икманаш, респираторный чер дене черланен кертмым ушештарыше нимогай пале уке гын, компьютер томографийым профилактике шот дене але кӱлеш лиеш манын ыштыктыман огыл. Тидлан нимогай амал уке, адакше тазалыкым аралыме системын пашажым уто гана нелемдаш нимолан.
Компьютер томографий шодышто иктаж вашталтышым рашемда гынат, тиде организмыште у коронавирус инфекцийын улмыж нерген огеш ойло. Тыгай вашталтыш чыла респираторный чер (мутлан, грипп) дене кылдалтын кертеш, манеш И.Тюрин.
Шуко пациент у коронавирус инфекций дене черланымыжым огеш шиж, огеш пале, тыгодым шодыштышт Covid-19 кӧра вашталтыш лийын кертеш. Тугеже, инфицироватлалтше еҥ-влакым рашемдаш манын, чыла еҥым КТ полшымо дене тергыман мо? Конешне, уке. Тидым ышташ огешат лий да эше тазалыклан лӱдыкшӧ.
КТ – черым рашемдыме неле йӧн. Тушто пациент шагал огыл лучевой нагрузкым налеш. Оборудований дене тӱҥ шотышто диагнозым пеҥгыдемдаш кӱлмӧ годым пайдаланат. Пациент коронавирус але респираторный инфекций черланен манын шонат, да тудо уже 4-6 кече орлана гын, рентген снимкым ышташ лиеш да кӱлеш. Черле улмо икымше арня мучашлан снимкыште нимогай вашталтыш огеш кой гын, компьютер томографият нимом огеш ончыкто.
КТ полшымо дене тыгак больницыш эмлалташ пышташ ямдылыме нелын черланыше пациент-влакым шымлат. Тидым эмлыше, амбулаторий але «вашкеполыш» врач-влакын палемдымышт почеш да клинический показаний улмо годым веле ыштат.
Компьютер томографийым палемдат:
— респираторный инфекций дене черланымым ончыктышо клинический палан, начарын шӱлышӧ да кугу температуран (39 деч кугурак градусан) пациент-влаклан;
— респираторный вирусан чер дене черланен кертше да сакыр диабет, шӱм чер, уто нелыт гай лӱдыкшӧ факторан еҥ-шамычлан.
КТ-шымлымашым черын куштылгын эртымыже да тазалыклан лӱдыкшӧ уке годым огыт ыште. Компьютер томографийым «кӱлеш лиеш» манын ыштыкташ шотлан ок тол! Шымлыме тиде йӧн, моло семынак, тазалыклан зияным ыштен кертеш.
И.ИВАНОВА
