Шернур посёлкышто илыше марий рвезе Дима Веденькин дене XI-ше Марий самырык тукым слётышто палыме лийынна. Тунам тудо шкенжым пеш чолган ончыктен. Тиддеч вара Димам тӱрлӧ мероприятийлаште шекланаш тӱҥальым.
— «Кеҥеж сылнымутчо — 2020» семинарыште вашлийме годым журналист лияш шонымашет дене палдарышыч. Мо дене ты профессий тыйым шкеж деке шупшеш?
— Чынак, пытартыш жапыште журналистикылан шӱмаҥынам. Тиде паша куштылгыжак огыл гынат, моткочак оҥай, шонем. Тӱрлӧ вашлиймашыш кошташ, калык дене мутланаш мыланем келша.
Теве школыштат радио передачым але эфирым вӱдем, шуко еҥ деч интервьюм налам, эсогыл видео гоч школ уверымат ямдылем. Тиде паша мыланем моткоч лишыл.
— Ик вере участник семын коштат гын, вес вереже организатор-влакын полышкалышышт улат. Кудо сомылжо утларак келша?
— Участник ден вуйлатыше йӧршын тӱрлӧ кумылым кодат. Мыланем организатор лияш келша. Молан манаш гын тиде ончыкылык илышемлан кугу шӱкалтыш. 2019 ийыште Шернур район Чылдемыр ялыште йоча-влаклан клуб пелен «Чылдемыр_fest» лагерьым эртаренам, Марий калык погынышто волонтёр пашам ӱшаненыт. Нине мероприятий-влак чонеш поро кышам коденыт.
Участникат лияш шуко гана пиал шыргыжын. Мутлан, XI-ше Марий самырык тукым слётышто лийынам, Российысе школ толкынын (РДШ-ын) эртарыме фестивальышкыже икмыняр гана ушненам, «Кенеж сылнымутчо» семинарыштат уш-акылем пойдаренам.
— Шукерте огыл ВКонтакте воткылыште «Марий улына!» тӱшкам почыч. Эше иктаж проектым интернетыште вӱдет?
— Кызыт шуко ялын шке тӱшкаже уло. Калык тушко вашла серышым возаш, шочмо верын сӧралжым ончаш пура. Мый шочмо Чылдемыр ял нерген тӱшкам вӱдем. Кызыт Шернур посёлкышто илем гынат, ялысе ковам деке уналыкеш чӱчкыдын коштам.
Воткылыште Татарстан кундем, Моско ола, эше иктаж вес вер-шӧрыштӧ илыше марий-влакын тӱшкашт шуко. Пӱтынь Российын кажне лукшо гыч марий-влакым ушышыжо уке. Нимогай «официальность» деч посна, чон почын кутыраш лийше, чылам иктеш чумырышо тӱшкам «шочыкташ» шоненам. Тыгак лие.
Кызытат теве «Муро дене чоҥешташ» маналтше у конкурсым эртарем. Тудо 15 ноябрь марте шуйна. Ушнаш шонеда гын, видеош мурым мурымыдам войзен, «Марий улына!» тӱшкаш колтыман. «Фрукт рекорд» йӱкым возышо студийым полышымыжлан тауштем. Конкурсышто сеҥышылан тудо сай пӧлекым ямдылен.
— Фотограф семынат шкендым тергет. Кузе шонет сылне фотосӱрет лекше манын мом ыштыман?
— Кенеж пагытыште самырык фотографат лийынам. Тунам онлайн йӧн дене курсым тунем лектынам.
Мотор фотосӱретым ышташ келшыше лукым (ракурсым) муман. Пӱртӱсыштӧ волгыдылыкым, войзымо верым шотыш налман.
Пытартыш гана Шкетан театрын икмыняр артистше-влаклан фотосессийым эртаренам. Нунын дене пашам ышташ куштылго ыле. Войзымо йӧре мыскарамат колтен шуктенна.
Умбакыжымат тиде сомыл деч ом кораҥ.
— Шке шочмо ялын, районын илышыжым саемдаш манын, мом ышташ лиеш?
— Мыйын шонымаште, коча ден кована-влакын йӱлаштым шуктыман: йырвелым арун кучыман, пӱртӱсым аралыман. Шочмо кундемын чапшым нӧлташ тыршыман. Чылажат мемнан кидыште!
— Марий Элын ончыкылык илышыжым кузе ужат?
— Волгыдо, куанле илыш мемнам вуча манын ӱшанем. Тек шушаш вашталтыш-влак сай веле лийыт.
— Тау, Дима, вашмутым пуыметлан. Шонымашет шукталтше.
— Тау!
О.МОШКИНА мутланен
