Ожно ялыште лӱҥгалтыш воктек модаш, мутланаш, кумылым нӧлталаш погыненыт. Лӱҥгалтыш айдемым кӱшыл ю вий дене ушышо символлан шотлалтеш.
Таклан огыл яллаште марий калыкын ожсек йӧратыме Семык пайремжылан эре лӱҥгалтышым сакеныт. Башкортостанысе Краснокам районышто тений тиде пайремым Корий ялыште латшымше гана эртареныт. Тудым Калтаса, Дӧртыльӧ, Краснокам районысо Арлан, Коян, Корий, Пӱрнӱш, Тумерсола, Шушнур, Йывангасола, Пураял, Кутлинка селала ден ялла гыч фольклор коллектив-влак сӧрастареныт.
Капка ончылно уна-шамыч кинде-шинчал дене такмакым ваш-ваш мурен саламлалтыныт. Урем дене мурен ошкылын, ӱстел сийым тамлен, мастар-влакын кидпашаштым шымлен, пайрем олыкыш чумыргеныт. Погынышо калыкым Краснокам район администраций вуйлатышын социальный йодыш да кадр шотышто алмаштышыже Л.Мустаева, Корий ялсовет вуйлатыше И.Хайбрахманов, «Эрвелмарий» культур автономийым вуйлатыше Р.Сатаева, Йывангасола ялсовет вуйлатыше К.Зайнакаева да молат саламленыт.
Ты кечын йӱла дене кылдалтше модыш, конкурс, марий мурымаш-куштымаш кумылым нӧлтеныт. Марий кочкышым эн сайын ямдылышым, кидмастар-влакым палемденыт. Фольклор коллектив-влаклан шергакан пӧлекым кучыктеныт. Ты йӱлам умбакыжат шуяш шонат. 2018 ийыште унам Пӱрнӱш ял вашлиеш.
Л. АЛЫНБЕКОВА.
Авторын фотожо.
Снимкыште: Корий ял калык Семыкыш толшо унам кинде-шинчал дене вашлиеш.
