6 майлан республикыштына икияшым 8473 гектарыште ӱдымӧ.
Ялозанлык да продовольствий министерствын увертарымыж почеш, тений икияш пырчан да отызан кушкылым чылаже 135,8 тӱжем гектарыште ӱдышаш улына. Тидыже кодшо ийысе деч куд тӱжем гектарлан шукырак. Вӱречылан шотлымаште чумыр кумдык гыч урлыкашым 6 процентыштыже вераҥдыме. Кеч лум шукертак шулен пытен да озанлык-шамыч ага пашалан ончылгоч ямдылалт шуыныт, игече вӱдыжгӧ да юалге шогымылан кєра мланде варашырак кодын топланен. Кодшо ийын тиде жаплан ўдышаш кумдыкын 19 процентыштыже ӱдымӧ ыле. Район-влакым ончалаш гын, У Торъял ден Медведево велне чулымынрак тыршат, тыште 19-15 процент кумдыкыш икияшым вераҥдыме.
Ӱдышаш мландым пушкыдемдымаште Шернур район ойыртемалтеш. Тыште 3225 гектарыште ӱдышаш пасу ямде. Медведево районышто 2710 гектарыште мландым пушкыдемдыме, У Торъял районышто – 2000 гектарыште.
Тений озанлык-влак кормалык кушкылым шагалрак кумдыкышто ончен кушташ палемденыт. Ӱмаште икияш кормалык культурым 29,7 тӱжем гектарыште ӱдымӧ улмаш гын, тений 26,1 тӱжем гектарыш вераҥдат.
Кодшо шыжым 88,9 тӱжем гектар мландым кылмаш курал кодымо ыле. Тышечын 45,2 тӱжем гектарыштыже пасум тырмалыме. Тидыже планын 51 процентше лиеш. Кодшо ийын тыгаяк жаплан 66 процентыште тырмалыме ыле.
Тений тӱшка ден фермер озанлык-влак пареҥгым 2238 гектарыште шындышаш улыт. Тидыже ӱмашсе деч 412 гектарлан шукырак лиеш. Кодшо ийын 6 майлан 500 гектарыш шындыме улмаш. Чумыр кумдык гыч 1930 гектарышкыже Курыкмарий районысо озанлык-шамыч шындаш палемденыт. А теве Кужеҥер, Оршанке да Шернур районлаште тений «кокымшо кинде» ик гектарымат ок айле.
Йытыным тений ӱмашсе нарак, 900 гектарыш, ӱдаш палемдыме. Тышечын 700 гектарыште Оршанке районышто ӱдат, 200 гектарыште – Советский районышто.
Ӱмаште шыжым кокияшым 35,7 тӱжем гектарыш ӱден кодымо ыле. Тышечын 32,3 тӱжем гектар озымлан ешартыш кочкышгым пуымо. Тидым палемдыман: тений озанлык-влак минеральный ӱяҥдышым кодшо ийысе деч ятырлан шукырак налын ямдыленыт.
В.СМОЛЕНЦЕВ
Авторын фотожо
