Республикышкына тӱрлӧ черын поснак осал возбудительже-влак деч аралыше шуко гана пайдаланаш лийме эше 2,5 тӱжем респираторым кондымо.
Тиде регионым вуйлатыше Александр Евстифеевын Марий Эл правительствын резерв фондшо гыч ойырымо средстваж дене налме сатун кокымшо партийже. Тылеч ончыч республикышкына икымше партий дене тынарак респираторым колтымо ыле.
Сатум кондымо шотышто контрактым «Респираторный комплекс» ООО (Ленинград область) дене ыштыме. Тудын дене келшышын, поставщик регионышкына чумыржо 13 тӱжем респираторым колтышаш. Сатун акше 1,5 млн. утла теҥге.
Респираторын утларак ужашыжым коронавирус дене черланыше да тиде инфекций дене авалталтын кертыныт манын шонымо пациент-влакым эмлыше инфекционный отделениян медицине организацийлашке ойырымо.
Марий Элым вуйлатышын организаций да аналитике виктемжын уверже негызеш М.ИВАНОВА ямдылен
