Шояк «банк пашаеҥ-влакын» оптышышкышт кодшо кечылаште эше кок еҥ логалын. Нуно чылаже 150 тӱжем теҥге деч посна кодыныт.
Йошкар-Олаште илыше нине кок ӱдырамашынат оксашт саде «пашаеҥ-влак» дене телефон дене мутланымышт деч вара «ӱштылалтын».
Тыге, мутлан, 63 ияш ӱдырамашыже палыдыме еҥлан смс-сообщений дене толшо кодым каласымыжлан кӧра эсогыл 130 тӱжем наре теҥгежым тудлан «пӧлеклен»! А «банк пашаеҥ» тиде ганат ончычсо семынак ыштен: йыҥгыртен да ты ӱдырамашланат счетшо гыч ала-кӧ оксажым шканже налаш тӧча манын увертарен. Тидым чарен шогалтышашлан банк картшын данныйжым да кодым каласаш йодын. Оксажым йомдараш лӱдынат, ӱдырамаш кӱштымыжым шуктен.
Тыгай йӧн денак рӱдолаште илыше 32 ияш ӱдырамашым ондаленыт. Тудо 24 тӱжем теҥгеж деч посна кодын.
Нине факт шотышто уголовный делам тарватеныт.
Полиций пашаеҥ-влак ушештарат:
— ондалалташ огыл манын, палыдыме еҥлан банк картын данныйжым, кодым каласыман огыл!
— Банк пашаеҥ-влак смс-сообщений дене толшо кодым, парольым нигунамат огыт йод.
Л.КАМАЛЕТДИНОВА
