Марий Эл Республик вуйлатышын обязанностьшым шуктышо Александр Евстифеевын 22 майыште лукмо пунчалже почеш Медведево районысо Дорожный посёлко кундемыште кайык грипп шотышто карантиным увертарыме.
Лӱдыкшӧ зоныш 5 км коклаште верланыше Сенькан, Какшансола, Пӱнчерсола, Кугу Шаплак, Нюхта, Поланур, Шихмамат, Юркан, Пелыждӱр, Шоядӱр яллам, Шойбулак селам, Аэропорт, Новый да Купсолинский посёлко-влакым, тыгак «Торфяник», «Тарханово», «Ветеран» да «Коммунальник» сад товариществе-шамычым, Йошкар-Олаште Оршанский микрорайоным пуртымо.
10 км коклам эскераш палемдыме, тушко Йошкар-Олам, Семёновка ден Пурсанур села, Нолька, Медведево да Знаменский посёлко-влакым, Данилово, Игнатьево, Якимсола, Кельмаксола, Гари, Кома яллам, «Звёздочка», «Мир», «Тюльпан», «Милосердие», «Мичуринец», «Цветочное» сад товариществе-влакым да молымат пуртымо.
Сурткайык тӱшкан колаш, черланаш тӱҥалме, колышо шуко чывым мумо годым граждан-влаклан, жапым шуйкалыде, Марий Элысе кугыжаныш ветеринарий службын тӧнежышкыже увертарыман.
Тиде пунчалым Марий Элын ялозанлык да продовольствий министрже Ю.Сидыгановлан контрольышто кучаш кӱштымӧ.
Ушештарена, 15 майыште тыгаяк карантиным Звенигово районысо Суслоҥгер посёлко кундемыште увертарыме.
М.ИВАНОВА.
