Йошкар-Оласе Чарла кремльыште ялозанлык ярмиҥга эртен. Тудо Сретеньылан да Молодежын кечыжлан пӧлеклалтын.
Тушко шке сатуштым ужалаш кумло утла предприятий, фермер да шке озанлык конденыт. Налше-влаклан ушкал ден сєсна, чыве, кӱрка шылым, пулдырчо муным, мӱйым да мӱкшын пуымо моло продукцийым, теҥыз да эҥер колым, кондитер сатум, вуйдеҥге чайым да молымат темленыт.
Руш православный черкын Йошкар-Ола да Марий епархийже Марий Элын Молодежный политике, спорт да туризм министерствыж дене пырля православный молодежын кечыжлан пӧлеклалтше «Сретене модмашым» эртарен. «Юл корно» пужен ыштыше историй клуб XV-XVII курымысо кӱртньӧ вургем дене кучедалме модышым ончыктен. Кумылан-влак былинысе патыр-влак рольышто лийын кертыныт, кучедалмаште, конкурслаште вийыштым терген сеҥеныт. А эн изи-шамычлан оҥай викториным да телымсе руш модышым темленыт. Кумылан-шамыч чай ден клендырым тамлен кертыныт. Творческий коллектив-влак оҥай программан пайрем муро ден куштымашым ончыктеныт.
Вес ялозанлык ярмиҥга 1 мартыште лиеш. Тудо Ӱярнялан пӧлеклалтеш.
В.СМОЛЕНЦЕВ
