1989 ийыште, айдеме иммунодефицитын вирусшо (ВИЧ) дене авалталтше-влакын палынак шукемаш тӱҥалмекышт, академик Евгений Иванович Чазовын вуйлатымыж почеш СССР-ын Тазалыкым аралыме министерствыже элнан чыла регионыштыжо СПИД дене кучедалме да тудын дене черланыме деч профилактикым эртарыме рӱдерлам почаш пунчалым луктын.
Тидын дене келшышын, 1990 ий 16 январьыште Йошкар-Олаште СПИД да инфекциян тӱрлӧ чер дене кучедалме, нунын дене черланыме деч профилактикым эртарыме рӱдерым почыныт.
Тӱҥ врачлан Ольга Михайловна Литовинскаям шогалтеныт. Тудак кадрым поген, рӱдерын пашажлан кӱлешан материальный базым чумырен.
Эн ончычак диагностике да иммунологий лабораторийым почыныт. Тушто врач-лаборант Анна Егошина, лаборант-влак Лариса Обухова ден Галина Харитонова пашам ышташ тӱҥалыныт.
…Тидлан ынде 30 ият темын. Рӱдерын пашаеҥже-влак чапле лӱмгечым паша верыштыштак палемдат, вет таче диспансер учётышто 1500 наре пациент шога, ты чот гыч 70 процент утла черлыже эмлалтеш. Тылеч посна рӱдерыште тыршыше-шамыч калык коклаште ВИЧ-инфекций деч профилактике йодыш шотышто увертарыме-мутланыме кугу кампанийым эртарат.
М.ИВАНОВА
