Алексей Голубцев 12 ноябрьыште 50 ияш лӱмгечыжым палемдыш. Тудо Шернур район Чывыж ялыште шочын. Шернур посёлкысо школышто 4-ше классым тунем пытарымеке, 1981 ийыште Йошкар-Оласе талантан икшыве-влаклан интернат-школыш тунемаш налыныт. Интернатым пытарымеке, ЗПП заводышто тыршен. Вара армийыште служитлен да 1990 ийыште Йошкар-Оласе художественный училищыш тунемаш пурен. Эрдене тунемын, кастене Ленин лӱмеш тӱвыра полатыште художник-оформительлан ыштен. 1994 ийыште Марий самырык театрыш пашам ышташ толын да ынде, ныл ий шуэш, театрын тӱҥ сӱретчыжлан тырша. Спектакльлан декорацийым, вургемым, вуйчиемым ямдыла.
Но Алексейын вуйыштыжо эре ик шонымаш пӧрдын: мультфильмым ышташ.
– Мультфильмым ышташ шкеак тунемынам, – ойла Алексей. – Анимационный программе-влакым кычалынам. Марий тӱвыра рӱдер Anime Studio программым налын. Тудын денак пашажым ворандарена. Тыге «Марла ойлаш тунемына» видеофильм ден «Марий йылме» видеоурокым ыштыме. Нуным дискыш возымо. Ынде йоча-влаклан, кызытсе технологийлан эҥертен, марла тунемаш йӧнышт уло.
Алексей Голубцевлан мультфильмыштыже Юкечын образше келша. Автор тиде геройым арам огыл ойырен налын, вет марий калыкын йӱлаштыже шуко мо кече дене кылдалтын. Умбакыже тудо, «Ший пӱян ший Пампалче» йомаклан эҥертен, мультфильмым ышташ шона. Тыгодым пашаже 3D формат дене келыштарыме лиеш. Умбакыжым Онарлан пӧлеклалтше мультфильмымат «шочыктынеже».
М.СКОБЕЛЕВ
Авторын фотожо да фоторепродукцийже
Снимкылаште: А.Голубцев
