Йошкар-Оласе Православий рӱдерыште «Кугу Сеҥымаш: наследий да наследник-влак» VII региональный образовательный Рошто лудмаш эртен.
Тыгай лудмашым Йошкар-Оласе да Марий епархий кажне ийын эртара да черке, верысе кучем, мер организаций-влак дене пырля регионысо мер илышын тӱрло сферысе тургыжландарыше йодыш-влакым решатлен толмо пашаште кылым ышташ полшышо йӧн семын акла. Тудым почмаште Марий Эл Правительстве председательын икымше алмаштышыже М.Васютин, ресубликысе образований да науко министр Наталья Адамова, марий митрополит Иоанн да молат лийыныт.
Таклан огыл лудмашым тений Кугу Отечественный сар теме дене кылденыт, вет вес ийын Кугу Сенымашлан 75 ий темеш да идалыкшымат элыштына Шарнымаш да чап идалык семын увертарыме. Сандене доклад-влак тыгак ты шучко пагытын историйжым, поснак черке илышым рашемдыме дене кылдалтыныт. Тӱҥ докладым историй науко кандидат Сергей Стариков ыштен гын, монах ден священник-влакын сар жапысе подвигышт нерген богословий кандидат иеромонах Серафим Пасанаев, тыгак сар жапыште марий кундемысе православный приход-влак нерген протоиерей Михаил Ильин каласкаленыт.
Тиде кечыен митрополит ойыртемалтше священнослужитель ден туныктышо-влакым палемден. Творческий коллектив-влак шке мастарлыкыштым ончыктеныт. Варажым Рошто лудмаш секцийлашке куснен. Кандаш направлений дене доклад-влак йоҥгалтыныт. Форум эртыме жапыште Православий историй тоштерын ямдылыме «Руш православный черке Кугу Отечественный сар годым» ончерже пашам ыштен.
С.НОСОВА
