Социальный обслуживаний системын стационар организацийлаштыже илыше инвалид-влакым профессийлан тунемаш, калыкыште шкем моло дене ик семын кучаш кумылаҥдыме шот дене Марий Элын Социальный вияҥмаш министерствыже начар тазалыкан инвалид-влак коклаште «Абилимпикс» чемпионатын ведомство-влак кокласе этапшым эртарен.
Тушко интернат тӧнежлаштыже илыше, Марий кугыжаныш университетын Кумшо ийгот университетшын колыштшыжо да инвалид-влакын мер организацийыштын еҥже-влак ушненыт.
Социальный обслуживаний системын тӧнежлаштыже, ты шотыштак психоневрологический интернатлаштыже илыше инвалид-влак тиде чемпионатыште мастарлыкыштым икымше гана тергеныт.
«Абилимпикс» чемпионатын ведомство-влак кокласе этапше вич компетенций дене эртен. «Бисер дене пидмаш», «Сылнын тӱрлымаш», «Крючок дене пидмаш», «Име дене пидмаш» компетенций-влак дене таҥасымаш 11 сентябрьыште Шоя-Кузнецово психоневрологический интернатыште лийын, «Йолчиемым олмыктымаш» компетенций дене – 12 сентябрьыште Строительно-промышленный техникумышто. Участник-влакын профессиональный мастарлыкыштым эксперт-шамыч акленыт. Конкурсышто сеҥыше-влак 3 октябрьыште эртараш палемдыме «Абилимпикс» чемпионатын региональный этапшылан ямдылалтыт.
Мероприятий интернатлаште чынжымак уста еҥ-влакын илымыштым пеҥгыдемден. Нуно региональный этапыштат шкеныштым профессионал семын ончыктат манын ӱшаныме шуэш.
М.ИВАНОВА
