Марий Элыште мер тӱҥалтышлан полышым пуымо шотышто III республиканский форумлан ямдылалтме паша тӱҥалын. Тудын дене кылдалтше йодыш кугарнян Марий Эл правительстве председательын икмыше алмашыштыже С.Сметанин дене каҥашеныт.
Тушко федеральный кучемын органже-влакын территориальный подразделенийлаштын, министерстве ден ведомствылан, муниципальный образованийлан вуйлатышышт ӱжалтыныт. Быт пожар ылыжме шотышо профилактике паша, вӱдым ситарыме, уремласе корным олмыктымо, школ автобус, калыкын лӱдыкшыдымылыкшӧ, муниципальный бюджетым шуктымо да моло шотыштат ятыр йодышым каҥашеныт.
Мер тӱҥалтышлан полышым пуымо форум идалыкат пеле ончыч регион вуйлатыше А.Евстифеевын темлымыж почеш эртаралташ тӱҥалын. Тиде жапыште калыкнан ятыр сай темлымашыжым илышыш шыҥдарен кертме. Тудын тӱҥ шонымашыже — верысе калык дене тыгай кылым ышташ, кунам кучем еҥ-влакын темлымашыштым колеш да вара нуным илышыш шыҥдараш полша. А кузе тыгай шонымашыжым кучемын органже-влак марте намиен шукташ, тидын нерген В.М.Васильев лӱмеш МарНИИЯЛИ директор Евгений Кузьмин каласкален. «Верысе калык ты але вес проектым темлыме дене шке илышыжым саемден кертме нерген пала, умыла гын, тиде пеш сай. Мутлан, памашым, шарныктыш верым, кудывечым тӱзаташ, корным олмыкташ лиеш. Мер тӱҥалтышлан полшышо республик кӱкшытан ты толкын — тиде моткоч йӧнан да лектышым пуэн кертше да тачысе кечылан сайын пашам ыштыше диалог формо. Еҥ-влак, кучем да ме — ты форумын участникше-влак — калыкнан йӱкшын ойыртемалтше катализаторжо улына. Икымше ошкылым верысе калык ышта, кокымшо ден кумшым, куштыжо окса ресурс да шонымашым илышыш шыҥдараш ешартыш вий кӱлеш, кучем ушна, — палемден Е.Кузьмин.
Таче тыгай форум-влак чыла муниципальный образованийыште эртат. Мер пашаеҥ-влак верысе калык дене вашлийыт, темлымашыштым чумырат. Тиде этапыште лач муниципальный кӱкшытыштӧ эн оҥай темлымаш-влакым ойырен налме паша кая. Вара илышыш шыҥдараш толшылан келшен толшо проект-влак дене 21 августышто республик кӱкшытан форумышто палдарат.
Марий Эл вуйлатышынорганизаций да аналитике виктемжын уверже негызеш С.НОСОВА ямдылен.
