ЙӰЛА МАРИЙ ЙӰЛА УВЕР ЙОГЫН

Российыштыжат – икымше

Пеледыш тылзын пытартыш кугарнянже Йошкар-Олаште, Агробизнес кадрым уэш ямдылыше марий институтышто латкандаш еҥ кидышкыже «Калык да религий кокласе кыл шотышто специалист»  дипломым нальыч. Нунын коклаште онаеҥ-влакат, культур аланыште тыршышат, журналистат лийыныт.

Шукертак шонен коштмо паша илышыш шыҥдаралте – марий юмыйӱлам келгынрак тунемаш, тудым тачысе жап дене келшышын вияҥдаш, мер пашам виктараш полшышо законжымат, кугыжаныш программыжымат келгынрак палаш посна курсым почмо. Йошкар-Оласе «Марий кумалтыш» общине Ираида Степанован тарватымыж дене тунемшаш еҥ-влакым идалык ончыч кеҥеж рӱдыштӧ погаш пиже. Республикысе юмыйӱла ушемын икмыняр общиныже, тыгак Йошкар-Ола, Озаҥ, Москва олала, Пошкырт ден Удмурт республикла гыч онаеҥ ден ты йӱлалан мелын шогышо-влак коло визытын погынышт. Индеш тылзе жапыште занятий-влакым МарГУ, ПГТУ, МарНИИЯЛИ, Агробизнес институт гыч специалист-влак (нунын коклаште палыме еҥ-влак Н.Попов, Е.Суслов, А.Смирнов, Л.Абукаева, Г.Шкалина), тыгак кугыжаныш службышто пашам ыштыше Э.Чемышев, Тӱҥ онаеҥ А.Таныгин Кужэҥер районысо общинын онаеҥже В.Актуганов, юрист В.Иванов, краевед И. Степанова да молат туныктеныт.

А тӱҥалтыште, идалык ончыч, лектышыш шумо шотышто кокытеланымашат лийын. Вет тыгай курсшо республикыште веле огыл, Российыштат – икымше. Посна тунемме программым ямдылаш, тудым кугыжаныш стандартлан келыштараш кӱлын. Юмылан тау, чылажат ик йогыныш ушалтын: шонымашат, полшаш кумылан еҥжат, туныктышыжат, тунемме вержат… Ӧршаш да шеҥгек чакнышаш уке – Марий юмыйӱлам моло йӱла семынак туныкташ, шымлаш, тудым у кӱкшытыш нӧлталаш чыла йӧн уло. Курсым эртыше семын эше ик ойыртемым каласыде ом керт: марий калыкын историйже, юмыйӱлаже, культуржо дене кылдалтше, тыгак экономике ден политике темыланат лекцийым марла лудшо специалистна-влак улыт.

Тӱҥалме кугу пашаште республикын Культур, печать да калык-влакын пашашт шотышто министрын алмаштышыже Г.Ширяева, институтын тунемме да шанче-методике паша дене икымше проректоржо И.Стукова кугу эҥертыш лийыныт. Вич еҥан комиссий ончылно кугыжаныш экзаменым кучымеке, «йыргешке ӱстел» йыр мутланымаш лие. А вара, институтын ректоржо Ю.Новоселов кажныланна дипломым кучыктен саламлыш.

Шушаш тунемме ийланат курсым погат. Кумылан-влак институтыш але Йошкар-Оласе «Марий кумалтыш» общиныш эҥертен кертыт.

С.Пехметова.

 

 

М.Скобелевын фотожо

Опубликовать в Одноклассники

Добавить комментарий