Туныктышо да предприниматель. Тыгайже, шарнем, ончычат икте веле огыл лийын. А вот лачак химий ден биологийым туныктышо да шкеак озым ден кушкылым ончен куштен ужалыше предприниматель нерген але марте колалтын огыл ыле. Тыгай еҥ дене, туныктышо да предприниматель Е.В.Кашина дене, Хлебниково школ ончылно, парк воктене, вашлияш логале.
Мо оҥайже, ты школышто тудын кочажат, Серафим Сергеевич Николаев, химий ден биологийымак туныктен. Да школ ончылнысо паркланат тудак кодшо курымысо 50-ше ийлаште негызым пыштен. Аважат, Людмила Серафимовна Морозова, тыштак историйым туныктен, РФ калык просвещенийын отличникше лийын.
— Кочамын тыгай знакше лийме нерген ом пале, но тудо чынжымак кугу пашам ыштен. Ятыр тунемшыже школ участкыште шымлымаш пашаш ушнен. Эсогыл тугай ӧрыктарыше результатыш шуыныт – ик вондыштак парчаште помидор кушкын, а вожышто – пареҥге. 60-шо ийлаште кугу арбузым ончен куштеныт да тудым ончыкташ ВДНХ-ш миен коштыныт, школ пеленысе участке коклаште сеҥышыш лектыныт, — каласыш Елена Викторовна.
Шкеже тудо Озаҥысе химий технологий институтым тунем пытарен, кум ий Киров областьысе Вятские Поляны олаште машиностроений заводышто инженер-технологлан ыштен. Вара шочмо селасе школыш пӧртылын да кызытсе марте, ынде 33 ий, химий ден биологийым туныкта. Коло ий утла кочаж семынак школ пеленысе участкым вуйлатен.
— Мемнан участкына районышто веле огыл, республикыштат эн сай лийын. Ик гана веле огыл шкенан пашанам ончыкташ ВДНХ-ш миенна. Школ пеленысе участкыште кешырым ончен куштымо шотышто шымлымаш пашана дене Российыште кокымшо верым налынна, — ешарыш туныктышо.
Тудо тыгак «Российын эн сай туныктышыжо» конкурсышто 2012 ийыште сеҥышыш лектын да Россий президентын грантшым налын. Россий образованийын почётан пашаеҥже.
— Мутат уке, тыгай шымлымаш пашам эртарен шогаш эреак мом-гынат наледаш, роскотыш пураш кӱлын. Санденак предприниматель пашалан пижаш шонен пыштышым – 2014 ийыште «Елена» ООО-м почым. Хлебниково села покшелне корно воктене изирак кевытым нальым да пашаш колтышым. Тушто сӧраллыклан але саскалан кӧра кусарен шындышаш тӱрлӧ кушкылым, озымым, пеледышым, эсогыл пареҥгым але тӱрлӧ нӧшмым налаш лиеш. Тидым мый бизнес семынат тунарак огыл, а кунаре хобби але кумыл йодмо сомыл семын ончем. Вет озымжым монь шке ончен куштем. Моло сатум кондымо шотышто сай фирме-влак дене пашам ыштем. Сандене удан аклыше уке. Клиент-влакат тӱҥ шотышто иктак улыт. Эсогыл интернет гоч заказым ыштат. Тушто мемнан посна странице уло – мом ужалымынам фото дене ончыктымо. Лишыл район ден яллашке ярак намиен пуэна але еҥ гоч колтена, — палдарыш шке бизнесше дене предприниматель.
Кевытыштыже самырык пашаеҥ Нурзия Зиятинова торгая:
— Сатуна шуко. Налше-влак толыт да кевытнам, озанам мокталтат. Елена Викторовна мылам ава гай — поро кумылан айдеме.
Порылыкшым тудо туныктымо да бизнес пашаште веле огыл, кундемым тӱзатымаштат ончыктынеже. Школ ончылнысо паркым сӧрастараш проектым ямдыла. Тидын дене тудо, калыкын темлымыжым шотыш налын, кочажын ыштен кодымо поро пашам чапландарынеже да тушкак шке надыржым ушынеже.
Юрий Исаков.
Снимкылаште: вуйлатыше Е.Кашина; кевытче Н.Зиятинова; школ ончылнысо парк.
Авторын да еш архив гыч налме фото.
