«Шереметьево» аэропортышто трагедий лийме шотышто Марий Элым вуйлатыше Александр Евстифеев чаманымашым каласен.
А.Евстифеев республикысе калык да шке лӱм дене Мурманск областьын гебернаторжын обязанностьшым жаплан шуктышо Андрей Чибислан да регионышто илыше-влаклан «Шереметьево» аэропортышто лийше авиакатастрофышто шуко еҥын ӱмыр лугыч лиймыж шотышто чаманымашым колтен.
«Трагедий пассажир-влакын илышыштым ик шагатыште наҥгаен да колышо-влакын ешыштлан, Мурманск областьлан пӧртылташ лийдыме йомдарымашым конден. Ме шучко рейсын пассажирже-влакын родышт да лишыл еҥышт дене пырля чот ойгырена. Тиде неле шагатыште нуным умылымо да нунын дене пырля улмо мутнам каласаш йодам. Сусыргышо-шамычлан писынрак паремаш тыланена» , – ойлалтеш чаманымашыште.
Авиакатастрофо 5 майыште лийын. Москва гыч Мурманскыш чоҥештыше йӱлышӧ самолёт «Шереметьево» аэропортыш шинчын. Мурманск областьыште кум кечаш траурым увертарыме.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен.