Марий Эл гыч лекше да кугу кӱкшытыш шушо землякна-влак дене кугешныде ок лий. Эшежым нуно кушеч лекмыштым, тыгайыш кӧн полшымо дене шумышт нерген огыт мондо гын, мокталтыман да поро мутым гына ойлыман. Ик тыгай еҥже дене таче лудшына-влакымат палымым ыштена. Тиде — Тӱнямбал сӱретче-влак федерацийын, Российысе сӱретче-влак ушемын членже Елена Нагоркина. Тудо тыгак талантан визажист да боди-артер семын палыме.
Шке жапыштыже Марий Элын Национальный президент школжым, вара Йошкар-Оласе художественный училищым тунем лектын. Еленан палемдымыж гыч, туныктышо-шамычын тудын сӱретче семын мастарлыкше уке манын ойлымыштат чаракым ыштен кертын огыл.
Жап эртен, ончыч сай визажист семын Йошкар-Олаште, вара Москваште чапым налын, сӱретче семынат шкеж нерген палдарен. Таклан огыл тудым 2009 ий гыч Останкино телецентрыште ЭКТВ школ-студийын гримм-стиль пӧлкажын вӱдышӧ туныктышыжлан налыныт. МUSIC BOX каналыште «Песни со звездами», «Золотой голос» телепроект-влакын стилистше лийын. Италийысе ик брендын вӱдышо визажистшыланат ыштен. Мастер-класс-влакым Российын тӱрлӧ олаштыже эртарен да кызытат эртара. Визаж денак Российын икмыняр ийысе чемпионатлаштыже эре сеҥышыш лектеден. Визажист семын мастарлыкшым шкежат эре нӧлта, эсогыл США-се специалист-влак денат тунемын.
Елена Российысе шоу-бизнесын лӱмлӧ еҥже-влак: О.Федорова, И.Апексимова, И.Отиева, Б.Киркоров, М.Хлебникова, А.Песков — да икмыняр группо — «На-на», «Челси», «Достучаться до небес» — да моло денат пашам ыштен.
Лӱмлӧ артист-влакын портретыштым вараже возаш тӱҥалын. Москваште тудым сай портретист семынат палат. А пытартыш жапыште живописьлан шӱмаҥын. Республикнан 100 ияш лӱмгечыжлан пӧлеклалтше ончерымат ямдылаш сӧра. А живопись велке савырнашыже кугезыже-влакын юмыйӱлашт кумылаҥден, ойла шкеже. Коваж дене кӱсотыш кумалаш коштмо пагыт ушешыже лакемын кодын. Санденак пытартыш жапыште сӱретче марий йӱлам утларак шымлаш тӱҥалын, да тудлан ты теме моткоч лишылыш савырнен.
Но тидын деч ончыч Елена омым ужын. Пуйто тудо ончерыште коштеш. А тушто коваж ден кочажым, отым возыман сӱретым ужеш. А сӱрет йымалныже шкенжын фамилийже лийын. Тыгай сынан омо ятыр йӱдым малаш пуэн огыл. Кузе тудым умылтараш манын, палыше-шамыч дечат йодыштын. А нунышт чылажат шке тукымет денак кылдалтын манын умылтареныт. Сандене кодшо ийын тудо, Марий Элыш толмеке, ик марий кумалтышыште лийын, онаеҥ деч ото дене кылдалтше сӱрет-влакым сӱретлаш сугыньым налын. Тидын деч вара тудын творческий кумылжо ылыжын, сӱрет почеш сӱрет шочаш тӱҥалыныт. Шукерте огыл Филлиппин посоллан тыгайрак сынан сӱретан шовычшым кучыктеныт. Садыже посоллан моткоч келшен да тудыжо моткоч ӧрыктарен. Санденак тудо Елена дене кылым ышташ темлен. Кызыт марий ӱдырын ончержым але мастер-классшым эртарыме нерген мутланымаш кая. А мастер-класс-влакым Елена чӱчкыдын эртара, визаж, сӱретлаш туныктымо шотыштат. Эсогыл США гыч палымыже-влак тудын ото дене кылдалтше тематикылан пӧлеклалтше сӱретше-влакым кӱкшын аклат.
А тыгеже кызытеш тудын персональный ончерже лийын огыл. Елена дене ме шукерте огыл Национальный президент школыш тунемше-влак дене вашлиймашке толмыж годым палыме лийна. Моткоч чолга, позитивный, пӱсӧ ушан, мотор капкылан ӱдырамаш. Тудо шке ийготшылан моткоч самырыкын коеш. Амал деч посна огыл арняште ныл гана бассейныш коштеш. Тидланже шылыжым эмгатымыже амалым ыштен. Визажист визажистак, эсогыл прическыжат моткоч ойыртемалтше. Таклан огыл студентше-шамычат тудын семын ӱпышт дене веле огыл, чурий сын шотыштат экспериментироватлат. Шкенжын ойлымыж почеш, Елена эрыкан сӱретче. «Кӱшыч темдымым» тудо ок чыте, творческий шӱлышлан мешая манеш. Нимо у деч ок лӱд. Оҥай пашам темлат — вигак келша, вара веле кузе тидым ыштен кертме нерген шонкалаш тӱҥалеш.
Президент школышто вашлиймашым тусо завуч Лариса Новикова организоватлен. Лач тудак веле Еленан ты школым тунем лектын кайымыж годым ончыкыжым художникак лияш тыланен. Ӱдыр кызытат тудлан таушта, вет моло туныктышо-влак тудын мастарлыкше улмым нигунам палемден огытыл. Юмылан тау, манеш Елена, илышыште чылажат лач тыге лийын, ваштареш эре сай еҥ-влак вашлиялтыныт.
Ик пагытыште тудо шкежат умылен: сӱретлыме паша деч посна ончыкыжым шкенжым ок уж. Кеч тунемаш кайымыж нерген пален налмеке, ачажат арня мутланен огыл, вет тудо ийлаште ты профессийым пешыже аклен огытыл.
Художественный училищым тунем лекме жаплан ӱдыр тупрӱдыжым эмгатен улмаш. Сандене врач-влак тудлан тыгай пашам муаш темленыт, кушто физический вийын кӱлешлыкше уке. Елена йӱдшӧ-кечыже сӱретлаш кумылаҥын, варажым визажистлан тунем лектын. Специалист семын Йошкар-Оласе ик спортклубышкыжо пашаш налыт. Мастарлыкым погымеке, декоративный косметике дене республик кӱкшытан чемпионатлаште участвоватлен да эре гаяк сеҥышыш лектын. Шыгыррак чучаш тӱҥалмеке, Москваште илыше палымыжын ӱжмыж почеш, тудын моторлык салонышкыжо пашаш каен. Кеч тушко куснымеке, ӱдыр ала-могай кугу кӱкшытыш шумо нерген шонен огыл. «Москва мыйын олаш савырнен», — манеш шкеже. Идалык гычак тудым Останкин телецентрыш пашаш ӱжыныт. Туштат опытым погымеке, визаж, боди-арт, фейс-арт дене тӱнямбал кӱкшытан конкурслаште шкенжым ончыкташ тӱҥалын да эре гаяк ойыртемалтын. Эсогыл ик ийын макияж дене Российын сборныйышкыжат пурен. Лу ий Москваште илыме жапыште илышыже шолеш, ойла шкеже.
Визажист семын Российысе шӱдыр-влакат тудым кумылын ӱжыныт. Пытартыш жапыште пародист А.Песковын группыж дене пашам ыштен. А вара ик татыште угыч сӱретлаш тӱҥалаш кумылжо лектын да Москосо С.Г.Строганов лӱмеш художественно-промышленный кугыжаныш академийын ик курсышкыжо тунемаш пурен. Курсышто портретым ик эн сайын сӱретлыше семын живопись ден искусствылан туныктымо искусство академийыште тудым аклат да туныктышо семын кодаш темленыт. Кызыт тушто ыштыме дене пырля эше макияж дене интерколледжыште туныкта. Телевиденийыште карьерем шукерте огыл мучашленам, манеш тудо. Тидлан кӧрат пытартыш жапыште сӱретче семын пашам ышташ тӱҥалын. Еленан ойлымыж почеш, сӱретым возен моштымым тудо изи годсек юзо шӱлышан пашалан шотлен. Яндар кагазеш кумылым нӧлтен кертше сӱрет нимо уке гыч ок шоч…
А шукерте огыл тудо «TOP 100 Russian Artists» тӱнямбал арт-проектыш пурен. Тудо Российын ик эн сай художникше-влакым уша. Тидыже Еленалан шке творчествыжым тӱнямбал кӱкшытыштӧ ончыкташ йӧным почын. А теве визаж дене тудо эсогыл книгамат савыктен луктын.
Е.Нагоркинан ача-аваже Советский районышто илат. Тудо чӱчкыдын нунын деке толын кая. Шке жапыште тунемме президент школымат ок мондо. Ок мондо веле огыл, кызыт Москосо академийыште пашам ыштымыж дене пайдаланен, школышто тунемше-шамычлан тушко да колледжыш тунемаш пураш полшаш шона, йӧным кычалеш, мутланен келшымашыжат уло.
Ты шотышто Елена ӱдыр-рвезе-шамычлан шкежат сай пример. Шуко сайын тунемаш, пашам ышташ гын, кӱкшӧ сеҥымашыш шуаш лиеш. Тунам Москваштат от йом, мӧҥгешла, тыйым палаш да аклаш тӱҥалыт. Кӧргӧ чон куатат пеҥгыде лийшаш. Тидымак Елена тунемше-влаклан тыланыш. Вашлиймашымат тудо моткоч оҥайын эртарыш, икшыве-шамычын кумылыштым налын керте. Садышт шуко йодышым пуышт. Мучаште сӱретче дене пырля уэш-пачаш войзалтыч.
Светлана Носова.
Снимкылаште: Е.Нагоркина.
Шукерте огыл Москваште «Мисс Мари Москва» моторлык конкурс эртен. Тушто Москван эн мотор марий ӱдыржылан Морко кундемыште шочшо Ирина Зоринам ойыреныт. Тудлан посна пӧлек шотеш Елена Нагоркина портретшым сӱретлаш сӧрен. Но тыглайым огыл, А Ирина марий национальный вургемым чийыше лиеш. Тиде сӱрет варажым Е.Нагоркинан Марий Элын 100 ияш лӱмгечыжлан ямдылыме ончержым пойдарышаш.
