Тений Российысе 89 субъектыште «Лӱдыкшыдымӧ да качестван автомобиль корно» национальный проект илышыш пурталтын. Корно дене кылдалтше пашам шукташ окса федеральный да регионысо бюджетла гыч ойыралтеш.
Проектын лектышыж семын федеральный ден регионысо корнылам, норматив дене келшышым ыштен, 85 процент марте шуйышаш улыт, 50 утла процент корно лакыла деч посна, тӧр лийшаш. Тыгак нине корнын 10 процентшым чот пайдаланыме радам гыч кораҥдаш палемдалтеш. Тидыже трассылаште машина утыждене погынымым иземдаш да кудалме годым водитель-шамычлан жапыштым аныклаш полшышаш.
Вес кӱлешан задаче – корно движений утларак лӱдыкшыдымӧ лийшаш. Светофорым, фотовидеофиксаций камер-влакым вераҥдыме, авыртышым ыштыме, тыгай сынан моло пашам эртарыме дене аварий ден туткар лийме верлам кок пачаш иземдаш палемдалтеш. Нацпроектын лектышыж семын тыгак аварийлан кӧра колымаш 3,5 пачаш шагалемшаш.
Пайдале технологий ден материалым кучылтын, паша лектышым экономике велым кугемдаш, ремонтын качествыжым кугемдаш, корно шартыш кужу жаплан ситыже манын тыршаш тӱҥалыт.
Российысе субъектлаште илыше-влаклан кызыт регионласе транспорт инфраструктурым вияҥдыме эн кӱлешан направлений-влакым палемдаш темлыме. Мутлан, кушто корным ачалыме але федеральный я региональный трассылаште машина кудалыштме чотым иземден кертме, корно движений лӱдыкшыдымылыкым кугемдыме. Тиде пашам 10 баллан шкала дене аклыман.
Йодыштмашке еҥ-влак bkdrf.ru. сайтыште ушнен кертыт. Йӱклымашке ушнышашлан http://bkdrf.ru/reception/polls ссылке почеш эртыман.
Йодыштмашын икымше иктешлымашыжым 15 апрельыште ыштат. Тудым идалык мучко ик гана веле огыл эртараш шонат.
Л.Камалетдинова.
