19 мартыште Марий Эл правительствын заседанийже лийын. Тудым Александр Евстифеев вӱден. Мутланымаште министерстве ден ведомство да муниципальный образований вуйлатыше-влак участвоватленыт.
Ончышаш паша радамысе икымше йодыш дене пӱртӱс ресурс, экологий да йырым-йырысе средам аралыме шотышто министр Владимир Шутовым колыштмо. Тудо чодыра фондыш пурышо кундемлаште пожар ылыж кертме лӱдыкшӧ жаплан ямдылалтме нерген каласкален.
Республикым вуйлатыше чодырам тул деч аралыме пашаш самырык-влакым да волонтер движенийын еҥже-шамычым ушаш муниципальный образований вуйлатыше-влаклан темлен.
Правительствын заседанийыштыже ончымо вес йодыш – верысе инициативым поддержатлыме шотышто проект-влакым шуктен толмым общественность велым контрольышто кучымо пашам виктарен колтымаш. Марий Элыште тиде программе 2014 ий годсек шукталтеш. Ий еда конкурс почеш ойырен налмашке чыла гаяк муниципальный образований деч 100 наре йодмаш пура. 2014-2018 ийлаште чылаже 526 проектым ончымо.
Социальный вияҥмаш шотышто министр Ольга Федорова шуко йочан улшо нужна еш-влаклан цифровой эфирный телевещанийын передачыже-влакым ончышашлан кӱлшӧ оборудованийым налаш кайыше роскотым петыраш ешартыш социальный полышым пымо нерген ойлен. Министерстве ты шотышто Марий Эл правительствын пунчалжын проектшым ямдылен. Проект сайлан шотлалтеш гын, Марий Элын республиканский бюджетшын роскотшо 10,5 миллин теҥгелан ешаралтеш. Министерстве тиде проектым сайлан шотлаш йодеш, каласен Ольга Федорова.
Тений 1 январьлан шотылмыште Марий Элыште шуко йочан 6895 еш социальный полышым налеш. Республикым вуйлатыше министрын йодмыжым поддержатлен, правительствын пунчалжым лукмо.
Заседанийыште ончымо рӱдӧ йодышыш корнылаште йоча-влакын сусырген да колен кертме лўдыкшым ончылгоч кораҥдыме теме савырнен. Ты йодыш дене правительстве председательын икымше алмаштышыжын пашажым жаплан шуктышо Александр Сальниковым колыштыныт.
Молодежный политике, спорт да туризм министр Лидия Батюкова правительствын заседанийыштыже «Марий Эл Республикын молодежный кадровый резервше» конкурсым эртарыме нерген каласкален. Тудо тений 18 март гыч 27 июнь марте эртаралтеш, конкурс талантан молодежь коклаште шуктен шогымо пашам саемден колташ полшышаш.
Марий Эл Республикым вуйлатышын организаций да аналитике виктемжын уверже негызеш П.Шакиров ямдылен
