3 мартыште участник-влак ече дене ончыко лекшаш верч таҥасеныт. Ӱдыр-влак коклаште Марий Эл гыч Е.Смирнова ший призёрыш лектын.
Тиде кече элнан сборныйжылан моткоч пиалан лийын. Пьедесталын чыла верыштыжат россиян-влак шогеныт. Нуным Российын президентше В.Путин шкеак саламлен, пєлекым кучыктен. Стартыш эн ончыч 68 ӱдырамаш (24 эл гыч) лектын. Участник-влак 5 километрым классике йӧн дене эртеныт. Кужу жап сай результат дене француз Лори Флошон куржын, но… варажым эн тале тӱшкаште лач россиян-шамыч гына лийыныт. Нунын коклаште шукышт опытан улыт, тӱнямбал кубокыштат вийыштым тергеныт. Куанен палдарыман, лач тушто Марий Эл гыч (кызыт Тюмень областьын чапшым арала, Пенза кугыжаныш университетыште тунемеш) Екатерина Смирноват лийын. Екатерина кокымшо верым сеҥен налын. Икымше верыш лекше Алиса Жамбалова деч 3,7 секундлан кодын, а вес россиянке, бронзо призёр Яна Кирпиченком, улыжат 0,7 секундлан ончылтен.
– Мыланем тиде ший медаль вучыдымо лийын. Пеш куаненам. Тыште поро шӱлыш озалана, манаш келшен толеш. Трассе чапле, – куанжым шылтыде манын марий ӱдыр.
Пєръеҥ-влак коклаште икымшыш Иван Якимушкин, кокымшыш Антон Тимашов (Москва), кумшо верыш Иван Кириллов лектыныт.
Е.Эшкинина.
