8 февральыште Нижний Новгородышто РФ Президентын Юл кундем федеральный округысо полномочный представительже Игорь Комаров «Россий телевизионный да радиовещательный кыл» ФГУП-н генеральный директоржо Андрей Романченко дене вашлийын. Нуно округын цифровой эфир телевизионный вещанийыш куснымыж нерген мутланеныт
Теҥгече икымше толкыныш пуртымо чыла шым регионышто – Магадан, Пенза, Рязань, Тула, Ульяновск, Ярославль областьлаште да Чечня Республикыште – федеральный телеканалын аналоговый сигналжым йӧртымӧ. Кокымшо толкынысо 20 регионат тидлан тӱрыснек гаяк ямде, нине кундемым «цифрышке» 15 апрельыште кусарат, 3 июньышто – кодшо 57 регионым. Таче 98,4 процент россиянин 20 каналым яра ончен кертеш.
Кодшо ий 3 декабрьыште аналоговый вещанийым Тверь областьыште йӧртен ончымо да цифровой телевиденийын пашажым радамлын шымлыме. Социальный сетьлаште тидын шотышто мутланыше-влакын чумыр чотышт гыч 1,5 процент еҥ гына у телевиденийлан уда акым пуэн, молыжо тудым сайлан шотленыт.
Тверьысе опыт волонтёр организаций-влакын кӱлешлыкыштым пеҥгыдемден. Таче чыла шым регионышто 10 тӱжем наре волонтёр пашам ышта, калыклан телевизионный приёмник ден цифровой приставкым шындаш полша.
«Россий Федерацийыште 2009-2018 ийлаште телерадиовещанийым вияҥдымаш» федеральный целевой программым илышыш пуртымо кышкарыште 5040 объектым чоҥымо, тышечын 932 объектшым – Юл кундем федеральный округышто. Чыла субъектыште «Россия 1», «Россия 24» да «Российын радиожо» каналлаште регионысо вещанийым кодымо.
А.Романченкон палемдымыж почеш, таче Пенза областьым телесигнал тичмашнек авалта, Ульяновск областьым – 95,5 процентлан. 15 апрельыште аналоговый передатчикым Киров областьыште, Мордовий, Удмурт да Чуваш республиклаште йӧртат, моло кундемыште – 3 июньышто.
И.Комаров Россий Президент Владимир Путинын мутшым эше ик гана ушештарен: цифровой телевиденийыш куснымо процесс чаткан да йыжыҥын эртышаш. Аналоговый вещанийым йӧртымӧ дене нигӧат йӧндымылыкыш пурышаш огыл.
«Аналоговый вещанийым йӧртымӧ деч ончыч телезритель-шамыч кызыт мом – «аналогым» але «цифрым» – ончымыштым тергышаш улыт. «Россия-1», «Первый канал», НТВ, ТНТ, «Пятый канал», «Рен ТВ», СТС да «Звезда» логотипла пелен «А» буква уло гын, тугеже аналоговый телевиденийым ончат, сандене телевизорым «цифрыш» кусараш кӱлеш. 2013 ий деч вара лукмо телевизор-влак DVB-T2 цифровой стандартан улыт. Тудлан дециметран антенне гына кӱлеш. Тылеч ончыч лукмо телевизорыш DVB-T2 кучышо цифровой приставкым ушыман», – телевизорым ончышо-влаклан темлен А.Романченко.
Округысо социально аралалтдыме тӱшкаш пурышо граждан-влаклан цифровой сигналым кучышо оборудованийым налаш материальный полыш ойыралтеш.
Ончылгоч шотлен лукмо почеш, икымше толкыныш пуртымо шым регионлан 200 тӱжем наре приставке кӱлеш. Таче кечылан тудым кок пачаш шуко ямдылыме. Приставкын акше 990 теҥге гыч тӱҥалеш.
Икмыняр жап ончыч РТРС цифровой телевизор ден приставкын эн изи акыштым каласен – 6,8 да 1 тӱжем теҥге. Смотрицифру. рф сайтыште антенне ден приставкым ужалыше 3000 утла кевытым ончыктымо, туштак цифровой стандартлан келшен толшо телевизорым тергаш йӧн уло. А «цифрыш» куснымо шотышто видеоинструкций разделыште телевизорым ончышо-влаклан ятыр пайдале материал уло.
М.ИВАНОВА.
