Кажне айдеме ошкылмыж годым почешыже кышам кода. Иктын тудо кугу да келге, весын изи да тунар раш огыл. Йӧршеш койдымо уке – чыланат тошкен коштмо мланде ӱмбалне могай-гынат палым кодена. Тӱсшӧ гына кок тӱрлӧ – ошо але шеме…
Чон шижеш, маныт…
«Авамжын телефонжо мо лийын? Молан ок ыште?» Паша кече мучко тиде йодыш ӱдырамашын ушыштыжо пӧрдӧ. 90 ияш аваже пачерыште шкетын ила. Илалше еҥ изи йоча гаяк, уке… «гаяк» манме ок сите дыр – тудым эшеат тӱткын эскерыман. Молан? Ньоган мом ыштен кертмыжым ончылгоч пален налаш да, манмыла, камвочмо верышкыже кӱпчыкым пыштен шукташ эше лиеш огыла. Конешне, чылаж годымак огыл гынат. А теве илалше айдемын ушышкыжо мо толын перна, ончылгоч шижаш куштылго огыл. Туге гынат пашам ыштыман. Тымарте аваже такше нимогай тыгай-тугайым ыштен огыл, адакшым пачер омсамат айда-лийже еҥлан ок поч. Но тачыже пачерысе телефонжо огешак ыште. Можыч, йолжо дене воштырыш логалын да тудыжо розетке гыч лектын возын? Тыгай шонымаш мыняр-гынат лыпландарен, но садак чонлан каньысырын чучын. Санденак паша кече мучашлалтмеке, тудо аваж деке миен шумыжымат ыш шиж – туге вашкыш. Чон шижеш, маныт. Тымарте шочмо хрущёвкышкыжо чылт тыгежак вашкымыжым пешыжак огешат шарне, а кызыт чон арам огыл писештарен улмаш: илалше еҥ малмыверыштыже шӱлыде киен, а ӱмбалныже – кӱпчык…
Следователь-влакын мутышт почеш, тудым шӱлышыжым петырен пуштыныт. Молан? Кӧ? Ӧрыктарышыже, пачер гыч нимо шергакан йомын огыл, но теве мо эшеат ӧрыктара – тиде ала-кӧэт илыме вер омсам прихожийысе тумбычкышто кийыше ключ дене тӱкылен лектын каен. А вет илалше еҥ тудлан омсам шкак почын. Кузе тыге? Кузе ӧрдыжъеҥ озам ӱшандарен кертын, тидлан могай шомакым ойлен, шкенжым кузе кучен? Икманаш, йодыш шуко, а вашмут уке…
«Мый электрик улам»
А уремыште шошо. 2011 ий 5 март. Пӱртӱс ылыжме пагытыште кеч-могай илалше лият гынат, илыш дене курымешлан чеверласымыже кӧн шуэш? Айдемым пуштшылан гына керек. Тудо тиде илалше еҥ дене гына серлаген огыл, шем кышаже уло Татарстан мучко палдырнен: лач тыгак илыш дене эше куд илалше еҥ чеверласен. Кандашымшат лиеш ыле, но тудым ала-могай Юмыжо утарен. Осал пашам ышташ мийыше еҥ чурийжым икмыняр гана совен, вара шӱйжӧ гыч пиктен. Но ӱдырамаш колен огыл, вуйушыжым гына йомдарен. Лач тудын полшымыж дене полиций пашаеҥ-влак айдеме пуштшын тӱжвал тӱсшым пален налыныт.
25-35 ияш. Кокла кап-кыл. 170-175 сантиметр кӱкшытан. Ны ок окшакле, ны мо – тугеже, таза, но какширак. Чурийже дене касвел калыкын эргыжла коеш, туге гынат ошалге-ракш ӱпан да тыгаяк ошалге шинчан.
Чыла. Тетла нимо. Адакшым шем пашажым эреак ик семын ыштылын, ончылгоч ямдылалтын. Тӱҥ шотышто тудо икымше, кокымшо але кумшо пачашыште шкет илыше 75-90 ияш ӱдырамаш-влакым эскерен. А нунын деке мийымеке, ик вере «электрик улам» манын, вес вере – пуйто слесарь але соцзащите пашаеҥ. Санденак, очыни, илалше-влак тудлан пачер омсаштым шкак почыныт. А омса лондемым вончымеке, самырык еҥ ӱдырамашын шӱйышкыжӧ кержалтын да пиктен. Пикташ пӧртыштак улшо ончылсакышым, кандырам, выньыкым, утюгын электровоштыржым, кӱпчыкым да молымат кучылтын. Шукыж годым оксам налын лектын, но ик гана ӱстембалне кийыше кандаш тӱжем теҥгем тӱкенат огыл.
Шекланыза: тудо эшеат эрыкыште
Мутат уке, Татарстаныште тудым кычалыныт. А варажым тушто веле огыл – лач тыгаяк шем кыша Одо, Пермь крайыш да Нижний Новгород, Свердловск, Саратов, Челябинск, Иваново областьлаште палдырнен.
Мемнан Марий Элыштат, Волжск олаште, 2011 ий 14 ноябрьыште 80 ияш илалше ӱдырамашым пиктен пуштын. Тидлан утюгын электровоштыржым кучылтын. Тыге айдемын праважым аралыше органлаште тыршыше-влакын увертарымышт почеш, 2011-2012 ийлаште 32 илалше ӱдырамашын ӱмыржӧ лач тыге кӱрлын. А осал пашам ыштышым «Юл кундемысе маньяк» манаш тӱҥалыныт.
Ӱмаште декабрь мучаште Россий Федераций Следствий комитетын Марий Элысе Следствий управленийже тудым кычалме шотышто уэш увертарымашым пуэн да полшаш йодын. Шекланыза: шучко пашам ыштен коштшо еҥым таче мартеат кычал мумо огыл. Кызыт иктеш ушымо уголовный дела дене расследованийым Россий Федераций Следствий комитетын Нижний Новгородысо Тӱҥ следствий управленийже эртара. Осал пашам ыштыше еҥ нерген уверым пуымылан 3 миллион теҥге (икмыняр ий ончыч ик миллион лийын) окса наградым пуаш палемдыме. Следствий управленийын телефонжо 89021021137, а Волжск олаште – (883631) 6-33-93.
Г.Кожевникова.
