27 ноябрьыште Российыште «Чаманыде пуымо кушкыжмо» («Щедрый вторник») акций кумшо гана эрта. Тушко волонтёр акций, концерт, лекций, эсогыл социальный сетьлаште поро кумыл темылан постым ыштыме дене ушнаш лиеш.
Кампаний кумдан эртыже, утларак палыме лийже манын, чыла участник «Чаманыде пуымо кушкыжмо» брендым кучылтеш.
Проектын Российысе организаторжо – «КАФ» филантропийлан полшышо фонд. Тудын пашаже поро кумыл программе-влакым виктарыме, грант конкурс-шамычым организоватлыме, проект-влакым консультироватлыме, шымлымаш-шамычым эртарыме дене кылдалтын.
Эртыше кок ийыште акцийыш Российысе чыла гаяк регион гыч 2000 утла организаций ушнен да 3500 утла поро кумыл мероприятийым эртарен.
Тиде акцийыш Марий Эл Республик тений икымше гана ушна. Коммерческий огыллан шотлалтше 700 утла организаций гыч мынярынже поро кумылым ончыктат – эше раш огыл. Тиде йодыш дене кызыт Социальный вияҥмаш министертстве пашам ышта.
М.ИВАНОВА.
