Коммунал услугым норматив почеш тӱлаш логалеш. А тидыже эшеат шергын шуэш.
«Справедливый Россий» фракций Кугыжаныш Думыш счётчикдыме пачерыште илыше-влаклан ЖКХ услугым шотлымо годым кугемдыме коэфициентым кораҥдыме нерген законопроектым темлен.
Фракцийым вуйлатыше Сергей Мироновын мутшо почеш, тидыже счётчикым шке кӱшеш шынден кертдыме нужна еҥ-влак дене гына кылдалтын.
Ушештарена, Российыште коммунал услугын акшым тений июльышто кӱзыктат. Кокла шот дене тудо 5 процентлан шергештеш. Тыгай распоряженийыш кодшо ий ноябрьыште Российын премьер-министрже Дмитрий Медведев кидшым пыштен. 2016 ий 1 июль гыч элыштына ЖКХ тариф чыла вере кӱзен. Коммунал услуго эн чотшо Москваште да Санкт-Петербургышто шергештын – 6,5 процентлан.
М.ИВАНОВА.
