ХII Марий калык погын почылтмо деч ончыч республикын рӱдолаштыже эше ик исторический событий лие – Марий паркым официально почыч.
Марий национальный шӱлыш дене пойдарыме у кумдык Йошкар-Олаште «Оласе кумдыкым йӧнаным ыштымаш» федерал проектлан кӧра ышталтын. Кок кужыт дене тудым тӱзатыме, тидлан 74 миллион теҥгем кучылтмо.
У паркым почмашым Марий Элын шочмо кечыжлан да Калык-влакын икоян улмо кечыштлан пӧлеклыме. Торжественный мероприятийыште Марий Эл вуйлатыше Юрий Зайцев, Марий Эл Кугыжаныш Погын председатель Михаил Васютин, Федераций Советыште Марий Эл деч сенатор-влак Консантин Косачев ден Сергей Мартынов, Йошкар-Олан мэржын пашажым жаплан шуктышо Антон Трудинов, Марий калык погыныш толшо делегат-влак лийыныт.
Юрий Зайцевын палемдымыж почеш, кызытсе жаплан келшышын тӱзатен шындыме парк Йошкар-Оласе мэрий пеленысе марий каҥашын темлымыж да рӱдолаште илыше-влакын ты федерал проектлан шке йӱкыштым пуымыштлан кӧра ышталтын. «Ынде тудо марий-влакым веле огыл, оласе калыкымат, уна ден турист-шамычымат шке декыже шупшаш тӱҥалеш. Тыште марий калыкын илышыже, тӱвыраже да йӱлаже дене лишкырак палыме лияшат йӧн уло»,–палемден тудо.
У Паркыште каналташ тӱрлӧ йӧн ышталтын, кугу куштымо площадке, йоча модыш зоно, тӱрлӧ лӱҥгалтыш, олымбал-влак улыт. Парк мучко йолын кошташ сай корно, изи архитектур формо-влак кумылым нӧлтат. Пычкемыш годым волгыдым пуышо ойыртемалтше светильник-влакым ситышын вераҥдыме.
Паркыш республикысе тӱрлӧ район дене палдарыше 17 стендым шогалтыме. Нуным йӱла, пайрем, оҥай событий, лӱмлӧ еҥ-влак дене палдарыше фотографий да текст-шамыч пойдарат. Тений кеҥежым пу гыч пӱчекдымаш фестиваль-конкурс годым кидмастар-влакын ыштыме скульптурыштымат ынде парк мучко шогалтылме. Пӱртӱс лоҥгаште нунат пеш сылнын койыт.
Марий калыкнан йӱла пайремже-влакымат ынде лач тыште тӱшкан погынен эртараш тӱҥалыт. Регион вуйлатыше парк дене кылдалтше проектым илышыш шыҥдарыше командылан да чоҥышо-влаклан тауштен да тудо оласе калыкын ик эн йӧратыме верже лиеш манын ӱшаным ыштен.
Марий Эл вуйлатышын пресс-службыжын уверже негызеш Светлана Носова ямдылен
