Кушкыжмын У Торъял районыш командировкыш мийышна. Пасу паша кузе кайыме нерген статьялан фотографийым ышташ кӱлешат, Шӱвылак ял мучашке миен толаш темлышт.
Пеш кудалына, ончена: корным ыштат! Паледа, тидым ужын, тушто илыше да тудын гоч вес яллашке кудалыштше-влак верч моткочак куанышым! Вет объездной манме корно гыч Шӱвылакыш савырнымеке, тудо тунар чот шӱкшӧ ыле! Паша дене тушто кудал эрташ кӱлмӧ годым, очыни, моткочак шуко еҥ семын мыят, ом шылте, «тыште корныжым кунам тӧрлатат гын?» манын, семынем ик гана веле шоненам.
Пиалеш, чыланыштын тынар чот вучымо тиде куанле тат толын шуын! Кеч верын-верын веле гынат, тӱҥжӧ – корным тӧрлатат да чот лакылан кумдыклашке у асфальтым шарат ыле. Сандене, пасушко миен толмеке, лӱмынак мутым вашталташ чарнен шогалде нигузеат ышна чыте. Тиде вет ты кундемлан моткоч кугу событий дене иктак.
– Тыште пашам кӧ вуйлата? – мо кузе ышталтмым ончен шогышо кугу капан, путырак серьезный чуриян самырык пӧръеҥ деч йодым. Тудо вашештыш:
– Сергей Викторович Глушков.
Вара пӧръеҥ тыште могай организаций пашам ыштыме, моло нерген кӱчыкын каласкалыш:
– Корным «Марий Эл Дорстрой» акционер ушемын У Торъялысе филиалже тӧрла. Программе почеш ме чылаже 2500 квадрат метр кумдык корным шотыш кондена. Пашам шочмын кечывал лишан тӱҥалынна да таче мучашлышаш улына. Тыште 12 еҥ тырша. Тиде асфальтым шарыше, корно пашаеҥ, «Каток», «Водовоз» дене ыштыше, икмыняр моло улыт.
Мутланен пытарымеке, тудо теве мом каласыш:
– Мастер Сергей Викторович Глушковшо мый омыл, а тудо, – мане да асфальтым наҥгайыше трактор гай транспорт дене пашам ыштыше, кабиныште улшо кок пӧръеҥ кокла гыч иктыже велыш ончыктыш!
– А мый «Марий Эл Дорстрой» акционер ушемын У Торъялысе филиалжын директоржо улам, – каласыш. Вара ешарыш: – Тудым паша деч лугыч ышташ огыл, тидлан кӧра паша ынже кучалт манын, олмешыже вашештышым. Молан манаш гын, мемнан кажне минутшо шерге.
«Тыгай молодец!» – тудын тиде умылтарымашыжым колыштын, семынем шоналтышым веле огыл, шканжак каласаш кумылем лекте:
– Могай Те молодец улыда! Ончыко ончен моштеда да кажне татым аныкледа! Эсогыл тевыс тыге чояланеда…
Вара чеверласыме годым ешарышым:
– Тольык Сергей Глушковшылан олмешыже мутланымыда нерген каласаш ида мондо. Уке гын ме шоячыш лектына.
– Каласем, – шыргыжалын вашештыш вуйлатыше.
Кушкыжмынак корным тӧрлатен шуктышаш улыт манын ойлышт гын, тугеже ты кундемысе калык ынде тиде кумдыкышто ласка-ан кудал эрта!..
Любовь Камалетдинова
М.Скобелевын фотожо
