Марий Элым вуйлатыше Юрий Зайцев Волжск олашке паша дене миен коштын да ятыр вере лийын.
Вашлиймаште оласе мер каҥашын йыжыҥъеҥже Давид Погосян 6-шо №-ан школлан у зданийым чоҥаш кӱлмӧ йодышым нӧлталын.
Тиде пӱсӧ йодыш кызыт мыняр-гынат шыгыремдыме условийыште тунемше ӱдыр-рвезе-влак дене кылдалтын. Палемдыме школым аварийныйлан шотлымо. У зданийым чоҥымо проектым Россий Федераций Просвещений министерствын программышкыже пуртымо да правительствыш ончаш колтымо.
– Школым чоҥымо нерген пунчалым лукмо, мыланна кӱлешан процедур-влакым гына эрташ кодын, – палемден Ю.Зайцев да тиде йодышым решатлаш полшымылан Федераций Советын председательже Валентина Матвиенко ден Марий Эл деч сенатор-влаклан тауштен.
Регионым вуйлатыше 4-ше №-ан школышто почмо кванториумыш миен.
Йоча технопаркым «Образований» национальный проектын полшымыж дене чоҥымо, тудо 2 август гыч пашам ышташ тӱҥалын. Тунемме аудиторий-влакым олмыктымо, тушко у мебель ден техникым шындыме. Науко-технологий рӱдерыште химий, физике, физиологий да экологий дене цифровой лабораторий-шамычым оборудоватлыме, робототехникым, 3D моделированийым да промышленный дизайным тунемаш тӱрлӧ йӧным ыштыме.
Ю.Зайцев лабораторий ден кванториумын мастерскойжо-влакым ончен, технопаркым профориентаций да технический специальностян специалист-влакым ямдылыме йодышлаште ончыко тошкалме кугу ошкыл семын палемден.
2023 ийыште 4-ше №-ан школым «Образованийын школ системыжым модернизироватлымаш» федеральный программе почеш капитально олмыктымо. Зданийыште класс аудиторий, рекреаций, спорт ден актовый зал-влакым, пищеблокым, тоштерым уэмдыме. Тылеч посна окна блокым, омсам, инженер коммуникацийым вашталтыме.
Олмыктымо деч вара школышто Йоча инициативе рӱдерым почмо, рекреацийлаште тунемше-влаклан урок деч вара вашла мутланаш да вияҥаш кызытсе жаплан келшыше кумдыкым келыштарыме.
Тений школ «Пилотдымо авиаций системе» национальный проектым илышыш пурта. Тунемме заведенийыш квадрокоптер, ноутбук-влакым да кӱлешан моло оборудованийым налме.
Республикым вуйлатыше «Родина» кинотеатрын зданийжым йоча сымыктыш школлан келыштарыме пашамат терген.
Таче кечылан тыште вӱд ден канализаций пучым, электротулым шупшмо, кӱртньӧ-бетон оралте ден металл леведышым олмыктымо. Тыгак подвалыште отделкым ыштыме. Кызыт леведышым, карниз ден зданийыш пурымо ужашым шотыш кондат, тӱжвалнат, кӧргыштат отделкым ыштат. Чыла паша «Культур» национальный проектын кышкарыштыже шукталтеш.
Уэмдыме зданийыште йоча сымыктыш школ ден 200 веран кинозал лийыт. Сымыктыш школышто тыгак концерт зал ден тӱшкан да посна заниматлалташ 13 кабинет пашам ышташ тӱҥалыт. «Хореографий» отделенийымат почыт. Зданийым 2024 ий мучаште олмыктен шукташ палемдыме.
– Тыште шуэн вашлиялтше объект – шуко функциян тӱвыра рӱдер –лиеш. Тудым почмашке толашак кӱлеш, – палемден Ю.Зайцев.
Регионым вуйлатыше тыгак Волжск оласе тӱвыра да каныме паркыште лийын. Тудым уэмдыме проект Российыште индешымше гана эртыше Йӧнан оласе йырвелым ыштыме эн сай проект конкурсышто сеҥышыш лектын. Паркыште йолгорным олмыкташ, сценым чоҥаш, уремысе мебельым шындаш, мероприятий-влакым эртараш кумдыкым, спорт да йоча-шамычлан модмо площадке-влакым, вӱд воктене каныме верым келыштараш палемдыме. Пашам 2025 ийыште тӱҥалыт. Паркым тӱзаташ да уэмден олмыкташ федеральный бюджет гыч 96,6 миллион теҥгем ойырымо.
Мучашлан Ю.Зайцев Юмын Аван Владимирский иконыж лӱмеш у православный черкыш пурен.
Марий Элым вуйлатышын пресс-службыжын уверже негызеш Маргарита ИВАНОВА ямдылен
