Марий Эл вуйлатыше Юрий Зайцев Морко район Шеҥше ялыште илыше индивидуальный предприниматель Сергей Григорьевын фермер озанлыкыштыже лийын.
Юрий Зайцев фермерын озанлыкыштыже мо улмым ончен савырнен. А тушто жаплан келшыше кок склад верланеныт. Иктыже – 1500 тонн вожсасакам, а весыже 1200 тонн пареҥгым аралаш келыштарыме вер. Тыгак сортироватлыше оборудований уло. Нуно погымо лектышым пайдалын кучылташ да сайын аралаш йӧным ыштат.
– Тиде пример ялозанлыклан кугыжаныш полышын пайдалыкшым раш ончыкта. Ме умбакыжат грантым да субсидийым налаш, у кумдык мландым кучылташ, у технологий-влакым шыҥдараш полшаш тӱҥалына, тыгодым кооперацийым вияҥдышашлан кугу тӱткышым ойырена, – палемден Юрий Зайцев.
Сергей Григорьев кугыжаныш полыш дене чолган пайдалана. Тудлан еш фермым вияҥдаш 4 миллион теҥге грантым пуэныт. Тиде окса дене пареҥгым шындаш GL 430 агрегатым, 6 миллион теҥге грант окса дене пареҥгым сортироватлаш да фасоватлаш оборудованийым налын. «Акселерация субъектов малого и среднего предпринимательства в Республике Марий Эл» проект дене келшышын, ялозанлык техникым налаш кучылтмо оксажым пӧртылташ 1,3 миллион теҥге субсидийым пуэныт.
Фермерын пашаже койын ворана. 2024 ийыште продукцийжым ужалыме деч ыштен налме парышыже 13 %-лан кушкын да 19,3 миллион теҥгешке шуын. Ӱмаште тудо 434 гектар мландыш ӱден. Тидыже ондакысе деч 87 гектарлан шукырак. Пакчасаскам 1618 тонным, тышеч 1372 тонн пареҥгым поген. Тиде лектышат ончылийысе дене таҥастарымаште ешаралтын.
2019 ийыште кресаньык-фермер озанлык вуйлатыше ялозанлык назначениян кучылтдымо 48 гектар мланде дене пайдаланаш тӱҥалын. Лишыл кок ий жапыште эше 84 гектарым пашалан кучылташ палемда.
Амалкалчын кокымшо направленийже кооперативын еҥже-влакын ончен куштымо пареҥгыштым да пакчасаскаштым налме дене кылдалтын. Кооперативын участникшылан кресаньык да личный озанлык-влак шотлалтыт. 2024 ийыште нунын деч 586 тонн пакчасаскам да 808 тонн пареҥгым налын.
Сергей Григорьевын пеҥгыде озанлыкше – республикыште ялозанлык дене кылдалтше пашам кугу лектыш дене шуктымо, тыгак еҥ-влакын ялозанлык пашам ышташ кумылышт кушмым ончыктышо сай пример.
Марий Эл вуйлатышын пресс-службыжын уверже негызеш Любовь Камалетдинова ямдылен.
