Марий Эл вуйлатыше Юрий Зайцев Россий Федерацийыште Узбекистанын Полномочный Посолжо Ботиржон Асадов дене вашлийын.
Нуно регион-влак коклаште сатум налме-ужалыме да экономике велым ваш полшен пашам саемден, товароборотым кугемден да туризмым вияҥден колтымо нерген мутланеныт.
«Мемнан эл-влак коклаште партнер кыл сай, товарооборот кугемеш. Ме кочкыш сатум, оборудований ден механике устройство, шем металл гыч изделий-влакым тушко колтена. Узбекистан граждан-шамыч мемнан вузлаште тунемыт. Ты элын текстильжымат мемнан дене сайын палат да йӧратат, качествыже сай. Импортат вияҥшаш. Кӱшыл шинчымашым пуышо организаций-влак коклаштат деловой кыл ышталтын. Марий кугыжаныш университет ден Узбекистанысе кугыжаныш университет-влак коклаште ойпидышым ыштымылан 7 ият темын. Мемнан задачына – чыла тидым вияҥдаш», – каласен Юрий Зайцев.
Ботиржон Асадов шокшын вашлиймылан тауштен да республикыште лийме икмыняр кечыште верысе предприятий-влакын пашашт дене палыме лиймыж нерген ойлен.
«Кажне предприятийда ойыртемалтше. Чыла вережат шочмо эл, кундем, калык ончылно социальный ответственностьым шижыт. Чынжымак, мемнан эл-влак колаште ончыкылан сай ӱшаным пуышо партнёрский, союзнический вашкыл ышталтын», – каласен Ботиржон Асадов.
Толшо уна Юрий Зайцев дене пырля Воин Чап монумент да Курымашлык тул воктеке пеледыш аршашым пыштен. Марий Эл вуйлатыше палемден: Кугу Отечественый сарыште лийше Узбекистан салтак-влакын кийыме верыштым рашемдыме. Тыгай паша республикыште 2021 ийыште шукталтын. 35 воинын лӱмжым пален налме. Нунымат ме шкенан землякна-влак семынак эре шарнаш тӱҥалына.
Марий Эл вуйлатышын пресс-службыжын уверже негызеш Светлана Носова ямдылен.
