Кугу Отечественный сарын участникшын тулыкеш кодшо пелашыже, тылыште тыршыше Клавдия Сергеевна Цветкова 22 апрельыште 100 ияш лӱмгечыжым палемден.
Клавдия Сергеевна Курыкмарий район Носола ялыште шочын. Ешыштышт кум ӱдыр лийын. Тудо – кыдалаш. Ача-авашт пашам чот ыштеныт, да ялыште ешышт поянлан шотлалтын. Тиде амаллан кӧра Клавдиям нунын дене пырля Сибирьыш, Соликамск олаш, ссылкыш колтеныт. Тушто землянкыште иленыт да йӱштым, шужымамашым шуко чыташышт логалын.
Идалык гыч ӱдырым марий кундем гыч родыжо шочмо ялышкыже конден. Икмыняр жап гыч ачаж ден аважат пӧртылыныт. Еш оза сплавщиклан пашаш пурен, да илышышт мыняр-гынат куштылгырак лийын. Клавдия, школым пытарымекше, Козьмодемьянскысе педагогический училищыш тунемаш пурен. Сар тӱҥалмеке, ӱдыр-рвезе-шамычым экстерн дене туныктен луктыныт.
Клавдия Сергеевна тӱҥалтыш класслам туныктышылан пашаш пурен. 1949 ийыште ӱдыр Иван Васильевич Цветковлан марлан лектын. Тудо ты жапыште Усола кыдалаш школышто туныктен, тыгак авиамодельный кружокым вӱден. Пӧръеҥ шкежак аэроиздерым ыштен да телым тудын дене йочашт-влакым школыш коштыктен. А нунын кум икшывышт шочын. Авашт икымше туныктышышт лийын. Кушкын шумекышт, чыланат кӱшыл шинчымашым налыныт.
Клавдия Сергеевна ӱмыржӧ мучко шочмо Курыкмарий районыштыжо тӱҥалтыш класслам туныктышылан ыштен да пашаж дене кугу пагалымашым сулен. Кызыт тудо ӱдыржӧ дене Йошкар-Олаште ила.
100 ияш лӱмгечыж дене Клавдия Сергеевна Цветковам республикысе паша да социальный аралтыш министрын алмаштышыже Галина Ярцева саламлен. Тудо Россий Президент Владимир Путин да Марий Эл вуйлатыше Юрий Зайцевын лӱмышт дене саламлымашан открыткым, шарнымашан пӧлекым да пеледыш аршашым кучыктен, палдара министерствын пресс-службыжо.
Любовь Камалетдинова.
